Goa Assembly Session : विधानसभेत राज्यपालांच्या भाषणावेळी विरोधकांचा गदारोळ

Goa Assembly Session : विधानसभेत राज्यपालांच्या भाषणावेळी विरोधकांचा गदारोळ पाहायला मिळाला. यानंतर मार्शलनी आंदोलन करणाऱ्या विरोधकांना सभागृहाच्या बाहेर काढले. आज हातात सेव्ह म्हादई सेव्ह गोवाचे बॅनर घेत विरोधक वेलमध्ये आले आणि त्यांनी जोरदार घोषणाबाजी सुरु केली.

म्हादई प्रश्नासह अन्य मुद्द्यांवर सरकारला घेरण्यासाठी विरोधक सज्ज झाले असून आजपासून सुरु होणाऱ्या चार दिवसांच्या विधानसभा अधिवेशनाच्या पूर्वसंध्येला काल रविवारी काँग्रेसचे युरी आलेमाव आणि एल्टन डिकॉस्ता, ‘आप’चे वेंझी व्हिएगस, क्रुझ सिल्वा तसेच गोवा फॉरवर्डचे विजय सरदेसाई यांची मडगाव येथे बैठक झाली. त्यात म्हादई प्रश्नावर सरकारला घेरण्याची व्यूहरचना आखण्यात आली होती.

आज सोमवारी दुपारी 4 वाजता विर्डी साखळी येथे होणाऱ्या म्हादई बचाव महासभेला सासष्टीतून जास्तीत जास्त लोक आणण्याची तयारीही या बैठकीत करण्यात आली. आजची बैठक आणि चार दिवसांचे अधिवेशन यात सर्वांनी कोणकोणती भूमिका निभावायची यावर विरोधकांची चर्चा झाली, अशी माहिती वेंझी व्हिएगस यांनी दिली.