पणजी: गोव्यातील पारंपरिक कुंभारकाम आणि मातीकलेने राष्ट्रीय पातळीवर आपली वेगळी ओळख निर्माण केली आहे. मये येथील सुपुत्र आणि प्रख्यात कारागीर अमर शेट यांना टेराकोटा आणि मातीकलेतील उत्कृष्ट कारागिरीसाठी केंद्र सरकारच्या वतीने मानाचा ‘राष्ट्रीय शिल्पगुरू पुरस्कार’ जाहीर झाला आहे.
‘कुंभारकाम, सिरॅमिक्स आणि टेराकोटा’ या श्रेणीत अमर शेट यांची या पुरस्कारासाठी निवड झाली आहे. हा प्रतिष्ठित राष्ट्रीय पुरस्कार मिळवणारे अमर शेट हे गोव्यातील पहिलेच कारागीर ठरले आहेत. त्यांच्या या यशामुळे गोव्याच्या हस्तकला क्षेत्रात एक नवा इतिहास रचला गेला आहे.
अमर शेट यांच्या या यशाबद्दल गोव्यातील कलाप्रेमी, स्थानिक कारागीर, हस्तकला क्षेत्रातील मान्यवर आणि विविध स्तरांतील व्यक्तींकडून त्यांचे अभिनंदन करण्यात येत आहे. गोमंतकीय पारंपरिक हस्तकलेच्या संवर्धनाच्या दृष्टीने हा क्षण अत्यंत अभिमानास्पद मानला जात आहे.
राष्ट्रपतींच्या हस्ते पुरस्कार वितरण
अमर शेट यांना हा पुरस्कार ९ डिसेंबर रोजी नवी दिल्ली येथे होणाऱ्या समारंभात राष्ट्रपती द्रौपदी मुर्मू यांच्या हस्ते प्रदान केला जाणार आहे. पारंपरिक कलेला नावीन्याची जोड देत त्यांनी साकारलेल्या कलाकृतींमधून गोव्याच्या समृद्ध संस्कृतीचा ठसा राष्ट्रीय पातळीवर उमटला आहे. त्यांच्या या निवडीमुळे गोव्याच्या पारंपरिक कुंभारकामाला आणि मातीच्या कलाकृतींना देशपातळीवर मोठी प्रतिष्ठा लाभली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
