पणजी: कर्नाटकच्‍या धर्तीवर राज्‍यातील अंगणवाडी सेविका व मदतनिसांना ग्रॅच्‍युइटी तसेच सर्वोच्च न्‍यायालयाच्‍या आदेशानुसार क्‍लास तीन व चारनुसार मानधनातून महागाई भत्ता, पीएफ तसेच पेन्‍शनचा लाभ मिळावा यासह इतर काही मागण्‍यांचे निवेदन गोवा अंगणवाडी सेविका संघटनेने मंगळवारी केंद्रीय मंत्री श्रीपाद नाईक यांना सादर केले.
संघटनेच्‍या अध्‍यक्ष सुनीता मुळगावकर यांच्‍यासह इतर पदाधिकारी यावेळी उपस्‍थित होते. गोव्‍यासह देशभरातील अंगणवाडी सेविका आणि मदतनिसांच्‍या प्रलंबित मागण्‍या केंद्र सरकारपर्यंत पोहोचवण्‍यासाठी आपापल्‍या राज्‍यातील खासदारांना निवेदने सादर करण्‍याचे निर्देश अखिल भारतीय अंगणवाडी सेविका संघटनेने सर्वच राज्‍यांतील संघटनांना दिले होते.
त्‍यानुसार राज्‍यातील संघटनेने आपल्‍या प्रलंबित मागण्‍यांचे निवेदन मंगळवारी केंद्रीय मंत्री नाईक यांना सादर केले आहे. दक्षिण गोव्‍याचे खासदार कॅ. विरियातो फर्नांडिस आणि राज्‍यसभा खासदार सदानंद शेट तानावडे यांनाही लवकरच याबाबतची निवेदने सादर करण्‍यात येणार असल्‍याचे मुळगावकर यांनी सांगितले.
दरम्‍यान, गोव्‍यासह सर्वच राज्‍यांतील खासदार अंगणवाडी कर्मचारी संघटनांकडून मिळणारी प्रलंबित मागण्‍यांची निवेदने केंद्र सरकारपर्यंत पोहोचवतील आणि त्‍याची दखल घेऊन केंद्र सरकारकडून या सर्व मागण्‍या तत्‍काळ सोडवेल, या हेतूनेच अखिल भारतीय अंगणवाडी सेविका संघटनेने हा निर्णय घेतला आहे.
अंगणवाडी सेविका, मदतनिसांना निवृत्तीनंतर महिन्‍याला १० हजार रुपये निवृत्ती वेतन मिळावे, सेविकांना टॅब देण्‍यात यावे, आजारपणात सुट्टी घेतल्‍यास मानधनात कपात करण्‍यात येऊ नये, सरकारी महिला कर्मचाऱ्यांप्रमाणे मुलांच्‍या संगोपनासाठी तसेच आजारपणात सुट्टी मिळावी, निवृत्ती वय ६२ वरून ६५ करण्‍यात यावे आणि सेविका आणि मदतनिसांना विमा योजनेचा लाभ द्यावा, अशा मागण्‍याही निवेदनातून करण्‍यात आल्‍या आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
