पणजी: विधानसभेच्‍या गत पावसाळी अधिवेशनात दिलेल्‍या आश्‍‍वासनानुसार महिला आणि बाल कल्‍याण खात्‍याने राज्यातील अंगणवाडी सेविका आणि मदतनीसांच्‍या मासिक मानधनात वाढ करण्‍यासंदर्भातील प्रशासकीय प्रक्रिया सुरू केली आहे.
सेविकांच्‍या मानधनात प्रत्येकी दोन हजार आणि मदतनिसांच्‍या मानधनात प्रत्येकी एक हजार रुपयांची वाढ करण्‍याचा प्रस्‍ताव खात्‍याने सरकारला सादर केला असून, सरकारच्‍या मान्‍यतेनंतर लगेचच या निर्णयाची अंमलबजावणी होईल, अशी माहिती खात्‍याच्‍या सूत्रांनी सोमवारी ‘गोमन्‍तक’शी बोलताना दिली.
राज्‍यात सध्‍या १,२६२ अंगणवाड्या असून, त्‍यात तितक्‍याच सेविका कार्यरत आहेत. निवृत्तीनंतर अंगणवाडी सेविका आणि मदतनिसांना सरकारकडून एकरकमी रक्कम देण्‍यात येते. परंतु, त्‍यांना मासिक पेन्‍शन देण्‍यात येत नाही.
निवृत्ती घेणाऱ्या सेविका आणि मदतनीसांना मासिक पेन्‍शन मिळावी, यासाठी अखिल गोवा अंगणवाडी सेविका संघटना गेल्‍या काही वर्षांपासून प्रयत्‍न करीत आहे. परंतु, सरकारने अद्याप त्‍यांची मागणी मान्‍य केलेली नाही. सरकारकडून ही मागणी मान्‍य करून घेण्‍यासाठी आपले विविध मार्गांनी प्रयत्‍न सुरू असल्‍याचे संघटनेच्‍या अध्‍यक्ष सुनिता मुळगावकर यांनी सांगितले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
