Goa Accident: अपघाताचे सत्र थांबेना! मुरगाव येथे भरधाव कारची दुचाकीला धडक, 55 वर्षीय वृद्धाचा मृत्यू; कारचालकावर गुन्हा दाखल

मुरगाव: राज्यात अपघातांचे प्रमाण दिवसेंदिवस वाढत असून रस्ते सुरक्षेचा प्रश्न पुन्हा गंभीर होत आहे. मुरगाव येथे रविवारी (ता.३० नोव्हेंबर) संध्याकाळी घडलेल्या भीषण अपघाताने संपूर्ण परिसर हादरला. बेदरकार वेगाने आलेल्या कारने समोरून येणाऱ्या स्कूटरला जोरदार धडक दिली.

अपघातात स्कूटर चालक मल्लिनाथ गौडर (वय ५५) यांना गंभीर दुखापती झाली होती. तत्काळ त्यांना जवळच्या रुग्णालयात हलविण्याची व्यवस्था केली. मात्र, जखमांचा तीव्रता इतकी गंभीर होती की उपचार सुरू होण्यापूर्वीच, रुग्णालयात पोहोचण्यापूर्वीच त्यांचा मृत्यू झाला.

घटनेची माहिती मिळताच स्थानिक पोलिसांनी घटनास्थळी धाव घेतली आणि पंचनामा करून पुढील तपास सुरू केला. अपघात घडविणाऱ्या कार चालकाची ओळख श्रीकृष्ण बांदेकर (वय २०) अशी झाली आहे.

या प्रकरणात पोलिसांनी कार चालकाविरुद्ध बीएनएसच्या संबंधित कलमांखाली गुन्हा दाखल केला आहे. आरोपी चालकाला ताब्यात घेऊन त्याच्याकडून पुढील चौकशी करण्यात येत आहे. पीएसआय सूरज टी. नाईक यांच्या मार्गदर्शनाखाली पुढील तपास सुरू आहे.

दरम्यान, या अपघातामुळे नागरिकांमध्ये रस्ते सुरक्षेबाबत चिंता वाढली असून प्रशासनाने कठोर पावले उचलून वाहतूक शिस्त कडक करावी, अशी मागणी होत आहे.