Ganesh Festival 2025: गणेशोत्सवाचा उत्साह आतापासूनच जाणवू लागला असताना, मध्य रेल्वेने कोकणवासीयांसाठी एक आनंदाची बातमी दिली आहे. गणेशोत्सवादरम्यान प्रवाशांची होणारी प्रचंड गर्दी लक्षात घेता, लोकमान्य टिळक टर्मिनस (LTT) ते मडगाव या मार्गावर 6 अतिरिक्त साप्ताहिक विशेष गाड्या चालवण्याचा निर्णय घेण्यात आला आहे. यामुळे मुंबईतून आपल्या गावी जाणाऱ्या लाखो भाविकांना आणि प्रवाशांना मोठा दिलासा मिळणार आहे.
गणेशोत्सवाच्या काळात कोकणात जाणाऱ्या गाड्यांना प्रचंड मागणी असते. त्यामुळे प्रवाशांना तिकीट मिळवण्यात अनेक अडचणी येतात. याच पार्श्वभूमीवर रेल्वे प्रशासनाने लोकमान्य टिळक टर्मिनस (LTT) आणि मडगावदरम्यान या साप्ताहिक विशेष गाड्या चालवण्याचा निर्णय घेतला आहे, जेणेकरुन प्रवाशांचा प्रवास अधिक सोयीस्कर होईल.
1. लोकमान्य टिळक टर्मिनस ते मडगाव साप्ताहिक विशेष (01003) ही विशेष गाडी 25 ऑगस्ट, 01 सप्टेंबर आणि 08 सप्टेंबर 2025 या तारखांना लोकमान्य टिळक टर्मिनस येथून सकाळी 08:20 वाजता सुटेल. ही गाडी त्याच दिवशी रात्री 22:40 वाजता मडगाव येथे पोहोचेल.
2. मडगाव ते लोकमान्य टिळक टर्मिनस साप्ताहिक विशेष (01004) परतीच्या प्रवासासाठी ही गाडी मडगाव येथून 24 ऑगस्ट, 31 ऑगस्ट आणि 07 सप्टेंबर 2025 या तारखांना दुपारी 16:30 वाजता सुटेल आणि दुसऱ्या दिवशी सकाळी 06:00 वाजता लोकमान्य टिळक टर्मिनस येथे पोहोचेल.
दरम्यान, या विशेष गाड्यांना ठाणे, पनवेल, पेण, रोहा, माणगाव, खेड, चिपळूण, संगमेश्वर रोड, रत्नागिरी, आडवली, विलवडे, राजापूर रोड, वैभववाडी रोड, कणकवली, सिंधुदुर्ग, कुडाळ, सावंतवाडी रोड, थिवी आणि करमळी या महत्त्वाच्या स्थानकांवर थांबा देण्यात आला आहे. यामुळे कोकण किनारपट्टीवरील अनेक शहरांमधील प्रवाशांना या सेवेचा लाभ घेता येणार आहे.
या विशेष गाड्यांमध्ये प्रवाशांच्या सोयीसाठी विविध श्रेणींचे डबे उपलब्ध असतील. यात 1 वातानुकूलित द्वितीय श्रेणी (AC-II), 3 वातानुकूलित तृतीय श्रेणी (AC-III), 2 इकोनॉमी वातानुकूलित तृतीय श्रेणी (AC-III Economy), 8 शयनयान (Sleeper), 4 सामान्य द्वितीय श्रेणी (General Second Class), 1 द्वितीय आसन व्यवस्था असलेला गार्ड ब्रेक व्हॅन (Guard Brake Van) आणि 1 जनरेटर व्हॅन (Generator Van) यांचा समावेश आहे.
तसेच, या विशेष गाड्यांसाठी तिकीट बुकिंग लवकरच सुरु होईल. प्रवाशांनी तिकीट बुकिंगसाठी भारतीय रेल्वेच्या अधिकृत संकेतस्थळाला (www.enquiry.indianrail.gov.in) भेट द्यावी किंवा एनटीईएस (NTES) ॲप डाउनलोड करावे. येथे त्यांना गाड्यांची सविस्तर माहिती, वेळापत्रक आणि उपलब्ध आसनांची माहिती मिळू शकेल. गणेशोत्सवादरम्यान कोकणात जाणाऱ्या प्रवाशांची गर्दी लक्षात घेता, या अतिरिक्त गाड्यांमुळे त्यांना सुलभ आणि आरामदायक प्रवास करणे शक्य होईल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.