Arambol: विदेशी पर्यटकांमुळे स्‍थानिक टॅक्सीचालकांचा व्‍यवसाय धोक्यात! किनारी भागातील वाढता प्रकार

Tourism season foreign tourists taxi business local drivers

हरमल: येथील किनारी भागात पर्यटन हंगामाच्या प्रारंभापासूनच अनेक विपरीत घटना घडत असल्‍याने अगोदरच असलेल्‍या समस्‍यांमध्‍ये आणखी भर पडत आहे. आता तर विदेशी पर्यटक बेकायदा टॅक्‍सीव्‍यवसाय करू लागल्‍याने स्‍थानिक टॅक्सीचालकांचा व्‍यवसाय धोक्यात आला आहे.

काल सकाळी दहाच्या सुमारास खालचावाडा-हरमल येथे एक विदेशी पर्यटक खासगी टॅक्सी (जीए ०३ झेड ६९५४) घेऊन आला व दोन विदेशी पर्यटकांना घेऊन जाऊ लागला. त्यावेळी स्थानिक टॅक्सीव्यावसायिकांनी हरकत घेतली व त्यास बोलते करण्याचा प्रयत्न केला. मात्र एक-दोन शब्दांशिवाय त्‍याने काहीच भाष्य केले नाही. मात्र ही भाड्याची टॅक्सी असल्याचे नंतर स्‍पष्‍ट झाले.

पोलिसांना कळविल्‍यानंतर टॅक्सी ताब्यात घेतली जाते व दंडात्मक कारवाईनंतर सोडून दिली जाते. विदेशींना भाडेपट्टीवर वाहन देणे व त्या पर्यटकांनी भाडी मारणे या खूप मोठा फरक आहे. पोलिसांनी अशा पर्यटकांवर कडक कारवाई करावी, अशी मागणी टॅक्सीचालकांनी केली आहे.

सरकारचे वाहतूक धोरण कुचकामी

सरकारचे वाहतूक खाते ‘रेंट अ बाईक’ योजनेअंतर्गत नवीन परवाने देत नाही व स्थानिकांनी खासगी दुचाकी भाडेपट्टीवर दिल्यास त्यांना दहा हजार रुपये दंड ठोठावले. वाहतूक परवाने दिल्यास सरकारला लाखोंचा महसूल मिळू शकतो व स्थानिकांना उदरनिर्वाह मिळू शकतो, असे मत हरमलमधील एक टॅक्‍सीव्‍यावसायिक गुरुनाथ नाईक यांनी व्‍यक्त केले. प्रत्यक्षात दुचाकींबाबत ठोस धोरण अमलात आणण्याची गरज आहे, असेही ते म्‍हणाले. वाहतूक खात्याच्या अधिकाऱ्यांनी याबाबत कडक कारवाई करावी व स्थानिक टॅक्सीव्यावसायिकांना दिलासा द्यावा अशी मागणी त्‍यांनी केली आहे.

आठवड्यात तिसऱ्यांदा घडला प्रकार

गेल्या आठवड्यात सलग तिसऱ्यांदा असा प्रकार घडल्‍याने टॅक्सीव्यावसायिकांनी संताप व्यक्त केला आहे. विदेशी पर्यटकांनी रशियन भाषेच्या माध्यमातून प्रवासी वाहतूक सुरू ठेवल्याने स्थानिक टॅक्सीव्यावसायिकांचा व्यवसाय धोक्यात आला आहे, असे टॅक्सीमालक प्रवीण वायंगणकर यांनी सांगितले. रशियन भाषेतील जाहिरातबाजी पोस्टर्समुळे टॅक्सीसह अन्य व्यवसायांना धोका निर्माण झाला आहे, असेही ते म्‍हणाले.