Russian In Goa: समुद्रात पोहणं बेतलं असतं जीवावर; गोव्यात 5 रशियन महिला पर्यटकांना जीवदान

कांदोळी: समुद्रात पोहणाऱ्या पाच रशियन महिला पर्यटकांना दृष्टीच्या जीवरक्षकांनी जीवदान दिले आहे. कांदोळी आणि बाणावली येथे पर्यटक महिला अडकून पडल्या होत्या. पोहता पोहता रिप करंट येथे महिला अडकून पडल्या. जीवरक्षकांनी तात्काळ महिलांना मंगळवारी (१० डिसेंबर) बाहेर काढले.

मिळालेल्या माहितीनुसार, कांदोळी आणि बाणावली येथे समुद्रात बुडणाऱ्या पाच रशियन महिलांचे प्राण 'दृष्टी मरीन'च्या जीवरक्षकांनी वाचविले. कांदोळी येथील समुद्रात तीन रशियन महिलांना वाचविले. ३० ते ४० वर्षे वयाच्या महिला एकत्र पोहत असताना रिप करंटमध्ये अडकल्या. जीवरक्षक कार्तिक नाईक यांनी त्वरित मदतीसाठी धाव घेतली.

रेस्क्यू बोर्डचा वापर करून त्यांनी या तिन्ही महिलांना सुरक्षितपणे किनाऱ्यावर आणले. बाणावली येथील समुद्रात ५१ आणि ५२ वर्षांच्या दोन रशियन महिला रिप करंटमुळे समुद्रात ओढल्या गेल्या. जीवरक्षक स्वप्नील फराडे यांनी एका महिलेला रेस्क्यू ट्यूबच्या साहाय्याने तर दशरथ सांगोडकर आणि समित यांनी दुसऱ्या महिलेला सुरक्षित बाहेर काढले.

समुद्रात पोहताना काळजी घ्या - दृष्टी मरीन

समुद्रात पोहताना काळजी घेण्याचे आवाहन दृष्टी मरीन'च्या वतीने करण्यात आले आहे. समुद्राच्या भागात लावलेल्या सूचनांकडे काळजीपूर्वक लक्ष देऊन त्याचे पालन करावे. धोकादायक आणि मनाई केलेल्या क्षेत्रात जाऊ नये तसेच जीवघेणे स्टंट करु नये, असे आवाहन त्यांनी केले आहे.