Fishing Season In Goa: मासेमारीच्या हंगामाला अजून गती नाहीच; कामगारांची कमतरता....

Fishing Season In Goa: मासेमारीचा यंदा हंगाम सुरु होऊन 20 दिवस उलटले असले तरीही कित्येक ट्रॉलर्स अजून जेटीवरच उभे आहेत. कामगारांअभावी त्यांना मासळी पकडण्यासाठी समुद्रात जाता येत नसल्याचे कुटबण जेटीवरील ट्रॉलर्स मालकांनी सांगितले.

यासंदर्भात, कुटबण मच्छिमार सोसायटीचे चेअरमन विनय तारी म्हणाले, की यंदा कामगारांची कमतरता भासत आहे. त्यामुळे अनेक बोटमालक चिंतेत आहेत. बोट मालकांनी पूर्ण तयारी केली असली तरी कामगार मिळत नसल्याने त्यांना समुद्रात बोटी नेता येत नाहीत. गोव्यातील बोट मालक हे पूर्णपणे परराज्यातील मजुरांवर अवलंबून आहेत. कामगार गोव्यात परतले तरच मासेमारी व्यवसायाला अधिक गती मिळेल. दरम्यान, ज्या लहान बोटी आहेत त्यांनी कमी मजुरांसह मच्छिमारी सुरु केली आहे.

अनेक कामगार कर्नाटकात; बोटमालक झारखंडमध्ये ः गेल्या वर्षी जेव्हा मासेमारीचा हंगाम संपला होता तेव्हा हे मजुर आपल्या गावी गेले होते. ते अजून परतलेले नाहीत. काही बोट मालक या कामगारांना महिन्याकाठी १३ ते १५ हजार रुपये देत होते. आता त्यांना कर्नाटकात रोजंदारीवर नव्हे, तर टक्केवारीप्रमाणे पैसे दिले जात आहेत. त्यामुळे कर्नाटकातील मजुर वर्ग गोव्यात परतलेला नाही, असे एका मासेमारी व्यावसायिकाने सांगितले. उल्लेखनिय म्हणजे, काही बोटमालक कामगारांच्या शोधात झारखंडमध्ये गेले आहेत.

दलालांकडून फसवणूक

कुटबण जेटीवर सध्या यांत्रिकी बोटी उभ्या आहेत. कामगार पाठवतो असे सांगून अनेक ट्रॉलर्समालकांना ते मिळालेले नाही. दलालांकडून फसवणूक झाल्याच्या घटनाही घडल्या आहेत. या जेटीवरुन केवळ ५० टक्के बोटीच मच्छिमारीसाठी समुद्रात उतरल्याची माहिती कुटबण बोट मालक संघटनेचे माजी अध्यक्ष सिप्रियान कार्दोज यांनी दिली.