Goa Fraud Case : पैसे उकळण्यासाठी ‘त्या’ डॉक्टरवर आरोप: आयएमए

Goa Fraud Case : प्रसिद्ध डॉ. प्रकाश अवदी यांच्याकडून पैसे उकळण्यासाठीच २७ वर्षीय युवतीने विनयभंगाचा आरोप केला आहे, असा दावा मडगाव ‘आयएमए’ ने केला आहे. त्यामूळे अवदी यांना पाठिंबा देण्यासाठी उद्या, सोमवारी मडगाव येथील डॉक्टर्स सकाळी पोलीस स्थानकावर जमणार आहेत.

डॉ. अवदी यांच्या विरोधात विनयभंगाची तक्रार सासष्टी येथील एका युवतीने मडगाव पोलीस स्थानकात दाखल केली होती. या प्रकरणी पोलिसांनी गुन्हा नोंद केला असून उद्या 21 रोजी सकाळी 10 वाजता त्यांना चौकशीसाठी बोलावले आहे.

‘आयएमए’च्या मडगाव शाखेच्या अध्यक्ष डॉ. बबिता आंगले यांनी आज मडगाव येथील आपल्या संघटनेच्या सदस्यांना पाठविलेल्या संदेशात ही तक्रार म्हणजे खंडणीवसुलीचा प्रकार असून अशावेळी आमच्या सदस्यांच्या पाठीमागे उभे रहाणे हे आमचे कर्तव्य आहे. या प्रकरणात आम्ही आयएमची राज्यस्तरीय समिती आणि न्यायवैद्यक समिती यांनाही निवेदन देणार आहोत, असेही म्हटले आहे.