कर्नाटकातून येणारे मासे विक्रेते आणि नागरीक चोर वाटेने गोव्यात

काणकोण - कर्नाटकातून गोव्यात येणाऱ्या नागरीकांना कोरोना निगेटिव्ह (Corona Negative) दाखला सक्तीचा आहे. अन्यथा तपासणी नाक्यावर चोवीस तास रॅपीड अॅन्टिजन (Rapid Antigen) तपासणी सेवा शुल्क सुरू करण्यात आली आहे. मात्र कारवार मधील मासे विक्रेते (Fish Sellers) व नागरीक पोळे तपासणी नाक्याला बगल देऊन आड वाटेने गोव्यात प्रवेश करीत आहेत.

दिवसाकाठी सुमारे पंचवीस मासे विक्रेत्या महिला तपासणीचा ससेमीरा चुकवत पोळे येथे प्रवेश करून कदंबा महामंडळाच्या बस गाड्यानी काणकोणच्या वेगवेगळ्या भागात मासे विक्रीसाठी जातात. याचाच फायदा अन्य नागरीकही घेत आहेत. त्यामुळे करोना महामारी काणकोण तसेच अन्य भागात पसरण्याचा धोका निर्माण झाला आहे.

कर्नाटकातील काही भागात डेल्टा प्लस रुग्ण सापडले आहेत. त्यासाठी या आडवाटा प्रशासनाने सील करण्याची गरज आहे. मासे विक्री करून झाल्यानंतर या मासे विक्रेत्या महिला बसगाड्यांनी पोळे पर्यत येऊन आडवाटेने पोलिसांच्या डोळ्यांदेखत निघून जातात.