डिचोलीत वॉकिंग ट्रॅकवरील पथदीप नादुरुस्त

डिचोली: शहराच्या वैभवात भर घालणाऱ्या वॉकिंग ट्रॅकवरील काही पथदीप गेल्या काही महिन्यांपासून पेटत नसल्याने या वॉकिंग ट्रॅकवर अंधाराचे साम्राज्य पसरते. पूल ते गावकरवाडापर्यंतच्या वॉकिंग ट्रॅकवर 31 पथदीपांची व्यवस्था करण्यात आली आहे. सद्यस्थितीत 31 पैकी किमान दहा पथदीप गेल्या 4 महिन्यांपासून नादुरुस्त आहेत. पथदीप एकतर दुरुस्त करावेत अन्यथा नवे बसवावेत, अशी रहिवाशांकडून मागणी होत आहे.

शहरातील जुना पूल ते गावकरवाड्यापर्यंत नदीकाठी बांधण्यात आलेला हा बांधवजा वॉकिंग ट्रॅक म्हणजे अनेकांचे विरंगुळ्याचे तसेच शतपावलीचे ठिकाण बनले आहे.

वॉकिंग ट्रॅक हा प्रकल्प झाल्यापासून दरदिवशी सकाळ संध्याकाळी या ट्रॅकवर लोक फेरफटका मारतात. 'कोविड'मुळे (COVID-19) काही महिने या वॉकिंग ट्रॅकवर सामसूम पसरली होती. मात्र महामारी नियंत्रणात आल्यानंतर पुन्हा या ट्रॅकवर लोकाची वर्दळ वाढली आहे. मात्र ट्रॅकवर मधे-मधे पथदीप पेटत नसल्याने रात्रीच्यावेळी मोठी समस्या निर्माण होत असते.

वॉकिंग ट्रॅक म्हणजे शहरवासीयांना वरदान आहे. महिला (Women), वृद्ध मिळून शेकडो लोक नियमितपणे वॉकिंग ट्रॅकवर पाय मोकळे करण्यासाठी येतात. वॉकिंग ट्रॅकवर मनमोकळे फिरण्यासाठी लोकांच्या (People) सुरक्षिततेकडे लक्ष देणे आवश्यक आहे.

-प्रदीप गोवेकर, रहिवाशी

काळोखाची भीती

या ट्रॅकवर महिलांचा वावर असतो. मात्र अंधाराचा फायदा घेत एखादेवेळी अनर्थ घडण्याची शक्यता नाकारता येत नाही. वॉकिंग ट्रॅकवर भटक्या कुत्र्यांचाही संचार असतो. त्यातच या ट्रॅकवर यापूर्वी साप आढळून आले होते. तर गेल्या वर्षी जुलैमध्ये नदीकाठी मगर पकडण्यात आली होती. यामुळे रात्रीच्यावेळी ट्रॅकवर फेरफटका मारण्यास घाबरतात. महिलांनी तर रात्री ट्रॅककडे फिरकणे सोडून दिले आहे.