Vijai Sardesai Statement: जिल्हा पंचायत निवडणुकीच्या निकालानंतर खोर्ली मतदारसंघात एका वेगळ्याच वादाला तोंड फुटले आहे. भाजपचे विजयी उमेदवार सिद्धेश नाईक यांनी आमदार राजेश फळदेसाई यांच्या उपस्थितीत भररस्त्यात नारळ फोडून आपला विजय साजरा केला. मात्र, ही आनंद साजरा करण्याची पद्धत नसून, गोवा फॉरवर्ड पार्टीचे निवडणूक चिन्ह असलेल्या 'नारळाचा' अपमान करण्याचा प्रयत्न असल्याचे विजय सरदेसाई यांनी म्हटले आहे.
खोर्ली जिल्हा पंचायत मतदारसंघात राजकीय समीकरणे अत्यंत रंजक होती. या जागेवर भाजपकडून सिद्धेश नाईक मैदानात होते. त्यांच्या विरोधात गोवा फॉरवर्डने आपला उमेदवार उभा केला होता. विशेष म्हणजे, गोवा फॉरवर्डशी युती असूनही काँग्रेसने देखील याच जागेवर आपला स्वतंत्र उमेदवार दिला होता.
या अटीतटीच्या लढतीत सिद्धेश नाईक यांनी विजय मिळवला. काल (२२ डिसेंबर) निकाल जाहीर झाल्यानंतर, गोवा फॉरवर्डच्या चिन्हाचा 'पराभव' दर्शवण्यासाठी सिद्धेश नाईक यांनी प्रतीकात्मकरीत्या नारळ फोडून भाजपचा विजय साजरा केला.
सिद्धेश नाईक यांच्या या कृतीवर संताप व्यक्त करताना विजय सरदेसाई म्हणाले की, "सिद्धेश नाईक यांनी उत्साहाच्या भरात 'श्रीफळाचा' अपमान केला आहे. श्रीफळ हे आपल्या संस्कृतीत अत्यंत पवित्र मानले जाते.
केवळ गोवा फॉरवर्डवरील राग काढण्यासाठी अशा प्रकारे पवित्र चिन्हाचा अवमान करणे हे भाजपच्या राजकीय अध:पतनाचे लक्षण आहे." सिद्धेश नाईक हे राजकीयदृष्ट्या या चिन्हामुळे प्रभावित झाल्याचे त्यांच्या कृतीतून दिसते, असा टोलाही त्यांनी लगावला. भविष्यात अशा प्रकारे सांस्कृतिक चिन्हांचा अनादर टाळावा आणि संयम राखावा, असा सल्लाही सरदेसाई यांनी दिला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.