Vijai Sardesai: गोव्यात 'एक्स्टॉर्शन तुमच्या दारी'; विजय सरदेसाईंचा गोवा सरकारवर घणाघात

Vijai Sardesai on Extortion: गोव्यात नुकतेच राज्य सरकारने प्रशासन तुमच्या दारी हा उपक्रम राबवला. त्यावर गोवा फॉरवर्ड पक्षाचे अध्यक्ष आणि फातोर्ड्याचे आमदार विजय सरदेसाई यांनी जहरी टीका केली आहे.

गोव्यात 'एक्स्टॉर्शन तुमच्या दारी' सुरू असल्याचा घणाघात त्यांनी केला. सरदेसाई यांच्यासह विरोधी पक्षनेते युरी आलेमाव यांनी संयुक्त पत्रकार परिषदेतून गोवा राज्य सरकारवर टीका केली.

सरदेसाई म्हणाले की, प्रशासन तुमच्या दारी कसले राबवता? राज्यात एक्स्टॉर्शन तुमच्या दारी सुरू झाले आहे. स्वतः सत्ताधारी आमदारच सांगत आहेत की, या खंडणी प्रकरणात डी कंपनीचा हात आहे. गृहमंत्र्यांच्या नावाने कोण खंडणी गोळा करत आहे?

स्वतः भाजपचे आमदारच हे सांगत आहेत, विरोधी पक्षातील आमदारांनी हे बोललेले नाही. विरोधक दिशाभूल करत आहेत, असा आरोप केला गेला म्हणून हे सांगितले. आम्ही दिशाभूल करत नाही. तुमचेच आमदार सांगत आहेत खंडणी मागितली जात आहे म्हणून.

खंडणीबाबतचे लेटरही दुसऱ्यांची नावे टाकून पाठवले गेले आहे. भाजप कुणाला वाचवत आहे? भाजप कुणााला क्लीन चीट देऊ इच्छित आहे?कळंगुटचे आमदार मायकल लोबो आता म्हणतात की, खंडणीचा विषय आता संपला आहे.

त्यांनीच हा विषय ओपन केला आणि आता तेच हा विषय क्लोज झाल्याचे सांगत आहेत. हे काहीच कळणारे नाही. असे होऊ शकत नाही. ही लोकशाही आहे. येथे चौकशी झाली पाहिजे.

सरदेसाई म्हणाले की, तक्रार नाही म्हणून पोलिस खंडणी प्रकरणाची चौकशी करायला तयार नाहीत. सु मोटो प्रमाणे स्वतः दखल घ्यायला काय होते. जेव्हा खुद्द आमदार, माजी आमदार खंडणीची तक्रार करत आहेत, त्यावेळी त्याची दखल घ्यायला नको?

आमदार हे लोकप्रतिनिधी आहेत. जबाबदार व्यक्ती आहेत. कुणीही रस्त्यावरील उठून आरोप केलेला नाही. आमदारांचे म्हणणे गांभीर्याने घ्यायला नको? खंडणी प्रकरणाची चौकशी का होत नाही? हाच आमचा सवाल आहे.