इलेक्ट्रिशियनचे स्वप्न अधुरे; 'शॉक' लागून विद्यार्थी ठार, वीजजोडणीचे करत होता काम; म्हावळिंगेतील घटना

डिचोली: म्हावळिंगे येथे नवीन घरातील वीजजोडणीचे काम करत असताना विजेचा धक्का लागून डिचोली आयटीआयमधील २१ वर्षीय विद्यार्थ्याचा दुर्दैवी मृत्यू झाला. अक्षत राजेश नाईक असे त्‍याचे नाव असून, तो डिचोली शहरातील लामगाव येथील रहिवासी होता. ही घटना काल शुक्रवारी रात्री उशिरा घडली.

अक्षत हा डिचोली औद्योगिक प्रशिक्षण संस्थेत (आयटीआय) इलेक्ट्रिशियन अभ्यासक्रमाच्या अंतिम वर्षात शिक्षण घेत होता. मिळालेल्या माहितीनुसार, एका कंत्राटदारासोबत तो म्हावळिंगे येथील नव्याने बांधण्यात येत असलेल्या घरात वीजजोडणीच्या कामासाठी गेला होता.

काम सुरू असताना अचानक ‘शॉक’ बसून तो खाली कोसळला. सहकाऱ्यांनी तातडीने त्याला डिचोली सामाजिक आरोग्य केंद्रात दाखल केले. मात्र, तपासणीनंतर डॉक्टरांनी त्याला मृत घोषित केले. शवविच्छेदन अहवालात विजेचा धक्का लागल्यामुळे त्याचा मृत्यू झाल्याचे स्पष्ट झाले.

दरम्यान, घटनेची माहिती मिळताच कुटुंबीय, नातेवाईक आणि लामगावातील नागरिकांनी आरोग्य केंद्रात धाव घेतली. कंत्राटदाराने त्‍याला उलटी झाली असे खोटे सांगितल्‍याचे, तसेच उपचारांसाठी नेण्‍यास टाळाटाळ केल्‍याचा आरोप अक्षतच्‍या नातेवाईकांनी केला आहे.

शनिवारी सकाळी शवविच्छेदनानंतर मृतदेह नातेवाईकांच्या ताब्यात देण्यात आला. सायंकाळी शोकाकूल वातावरणात अक्षतच्‍या पार्थिवावर अंत्यसंस्कार करण्यात आले. या प्रकरणाचा पुढील तपास डिचोली पोलिस करत आहेत.

आई-वडिलांचा एकुलता एक मुलगा

अक्षतच्या पश्चात आई-वडील आणि एक बहीण असा परिवार आहे. तो आई-वडिलांचा एकुलता एक मुलगा होता. शांत, मनमिळाऊ आणि अभ्यासू स्वभावामुळे तो सर्वांचा लाडका होता. त्याच्या अकाली निधनामुळे कुटुंबावर दु:खाचा डोंगर कोसळला आहे. तसेच डिचोली परिसरात हळहळ व्यक्त होत आहे.