राजभवनातील दरबार हॉलचं उपराष्ट्रपतींकडून उद्धाटन

पणजी : माझ्या हृदयात गोव्याचे मोठे स्थान आहे. देशाला स्वातंत्र्य मिळून 75 वर्षे झाली असली तरीही गरिबी, निरक्षरता, भेदभाव ही आव्हाने कायम असल्याचं मत उपराष्ट्रपती व्यंकय्या नायडू यांनी केलं आहे. राजभवनातील दरबार हॉलच्या उद्घाटनावेळी उपराष्ट्रपती नायडूंनी गोव्याबद्दल गौरवोद्गार काढले आहेत. लोकमताचा आदर करण्यासाठी सहनशीलता हवी, असं मतही यावेळी उपराष्ट्रपती व्यंकय्या नायडूंनी व्यक्त केलं. (Durbar Hall inaugurated in Raj Bhavan Goa News Updates)

उपराष्ट्रपती व्यंकय्या नायडू सध्या गोवा (Goa) राज्याच्या दौऱ्यावर आहेत. काल गुरुवारी संध्याकाळी ते गोव्यात दाखल झाले. उपराष्ट्रपतींच्या हस्ते राजभवनातील दरबार हॉलचं उद्धाटन करण्यात आलं आहे. या हॉलमध्ये यापुढे विविध कार्यक्रमांचं आयोजन केलं जाणार आहे. महत्त्वाचे सरकारी कार्यक्रम याच हॉलमध्ये घेतले जातील. याआधी सर्व कार्यक्रम जुन्या दरबार हॉलमध्ये घेतले जात होते. मात्र आता ते सर्व कार्यक्रम सुसज्ज अशा नव्या हॉलमध्ये घेतले जातील.

गोव्यात सध्या विधानसभा निवडणुकीचा (Goa Assembly Election) निकाल जाहीर होणार आहे. त्यामुळे नव्या सरकारचा शपथविधीही याच दरबार हॉलमध्ये घेण्यात येणार आहे. हा दरबार हॉल राज्यातील दुसरा सर्वात मोठा हॉल असल्याचंही बोललं जात आहे. शपथविधीनंतर शासकीय कार्यक्रमांसाठी राज भवनातील (Raj Bhavan) हा हॉल वापरला जाणार आहे.