अवकाळी पाऊस, उष्णतेमुळे गोव्‍यातील काजू पीक घटले

पणजी: काजू उत्‍पादनात गोवा अग्रेसर मानला जातो. मात्र यंदा काजूचे उत्पन्न घटल्‍याने काजू उत्‍पादकांतून काळजीचा सुर उमटत आहे. राज्‍यातील बहुतांश भागात काजूची मोठ्या प्रमाणात लागवड केली जाते. विशेषतः पेडणे, सत्तरी, डिचोली या तालुक्‍यात मोठे उत्‍पन्न घेतले जाते.

याबाबत कृषी संचालक नेविल अल्‍फान्‍सो यांना विचारले असता ते म्‍हणाले, दमट हवामान आणि अवकाळी पावसामुळे यावर्षी काजू उत्‍पादन घटले आहे. गोव्‍यातील काजुगरास देशातून आणि जगभरातून मागणी असते. यामुळे बहुतांश शेतकरी काजू उत्‍पादनाकडे अधिक वळतात. यावेळी वातावरणात मोठ्या प्रमाणात बदल दिसून आला.

दमट हवामान तसेच वाढलेली उष्णता यामुळे काजूचा मोहोर गळून पडला. तसेच गेल्‍या पंधरा-वीस दिवसांत झालेल्‍या पावसामुळेही फळे गळाली. राज्‍यातील काजु उत्‍पादनात अंदाजे 40 टक्‍के इतकी घट झाली असल्‍याचे त्‍यांनी सांगितले. राज्‍यात सुमारे 55 हजार हेक्‍टर इतक्या मोठया प्रमाणात काजूची लागवड करण्यात येते. दरवर्षी प्रति हेक्‍टर 500 किलो या प्रमाणात अंदाजे 24 हजार मेट्रिक टन इतके काजू बियांचे उत्‍पन्न होते. मात्र यंदा यात घट होण्याची शक्‍यता आहे. काजूगर काळी पडल्‍याने यांना चांगला दर मिळत नाही, अशी माहिती कोपार्डे - सत्तरी येथील काजू उत्‍पादक उल्‍हास सामंत यांनी दिली. सत्तरी तालुक्‍यातील बागायतदार आणि शेतकरी मोठ्या प्रमाणात काजू उत्‍पन्न घेतात. बहुतांश शेतकऱ्यांचा उदरनिर्वाह काजू उत्‍पन्नावरच अवलंबून आहे. यावर्षी काजू उत्पन्नात घट झाल्‍याने आम्‍ही चिंतेत असल्‍याचे श्री. सामंत म्‍हणाले.

सामाजिक कार्यकर्ते ॲड. शिवाजी देसाई म्हणाले, साधारणपणे मार्च महिन्‍यात काजूचे पीक काढणीस येते. पण यंदा अवकाळी पाऊस आणि प्रचंड उष्णता यामुळे मोहेार गळून पडला आहे. शेतकऱ्यांच्‍या नुकसानीचा विचार करून सरकारने काजूची आधारभूत किंमत वाढवावी, अशी मागणी ॲड. देसाई यांनी केली. कृषी खात्‍याच्‍या योजनांतर्गत सरकारने काजू उत्‍पादकांची मदत करावी. आणि सर्वसामान्‍य शेतकऱ्यांना दिलासा द्यावा, असे आवाहन त्‍यांनी केले.

दरम्‍यान, काजू उत्‍पादकांचे नुकसान झाले आहे. निम्याहून अधिक पीक वाया गेले आहे. कृषी खात्‍यातर्फे याचा आढावा घेतला जाईल, अशी माहिती श्री. अल्‍फान्‍सो यांनी दिली.