फोंड्यातील मलनि:स्सारण ‘एसटीपी‘ प्रकल्पामुळे रस्त्यांचे तीन-तेरा वाजले आहेत. मात्र त्याचा त्रास सर्वसामान्य नागरिकांना भोगावा लागतोय. हे रस्ते दुरुस्त केले, हॉटमिक्स डांबरीकरण केले म्हणून उद्या ते शाबूत राहतीलच, असेही नाही. कारण नियोजनाचा अभाव. या विकासकामांबाबत कोणतेच नियोजन नसल्याने फोंड्यातील मलनि:स्सारण प्रकल्पाचे काम गेली दहा वर्षे चालले आहे.
फोंड्याचे आमदार रवी नाईक यांनी फोंडा मतदारसंघाचा सर्वांगीण विकास साधताना आवश्‍यक विकासप्रकल्पही उभारले. मात्र विकास ही प्रक्रिया निरंतर सुरूच राहणारी असल्याने रस्ते, पाणी आणि विजेची कामे ही कायम सुरूच असतात. फोंड्यात भूमिगत वीजवाहिन्या टाकण्यासाठी शहर आणि इतर परिसरातील रस्ते खोदण्यात आलेले आहेत.
त्यापूर्वी मलनि:स्सारण प्रकल्पामुळे रस्त्यांची स्‍थिती दयनीय झाली होती. नंतरच्या काळात आला घरगुती गॅसवाहिनीचा प्रकल्प. त्यासाठी नव्याने रस्त्याचे खोदाई. इकडे रस्त्यांचे डांबरीकरण केले जाते, तिकडे या कामांसाठी रस्ते पुन्हा खोदले जातात. शेवटी प्रत्येक खाते आणि संबंधित कंत्राटदारामध्‍ये समन्वय असावा लागतो, जो फोंड्यातील या कामांमध्‍ये दिसत नाही.
मलनि:स्सारण प्रकल्पाचे काम गेली दहा वर्षे सुरू आहे. वास्तविक हे काम तीन वर्षांत पूर्ण व्‍हायला हवे होते. पण एवढी वर्षे हा प्रकल्प पूर्ण करण्यासाठी लागल्याने त्याचा फटका रस्त्यांना बसला आहे. वास्तविक मलनि:स्सारण प्रकल्प ही काळाची गरज आहे. पुढील काळात अशा प्रकल्पाची आवश्‍यकता आहेच. पण या प्रकल्पाच्या वाहिन्‍या टाकण्यासाठी आणि चेंबर बांधण्यासाठी रस्ते मधोमध खणण्यात आले आहेत. त्‍यामुळे अपघातांचे प्रमाण वाढले आहे.
मलनि:स्सारण प्रकल्पासोबतच घरगुती गॅसवाहिनी आणि भूमिगत वीजवाहिन्यांच्या कामासाठी अजूनही फोंड्यातील रस्ते खोदण्यात येत आहेत. भल्या मोठ्या विहिरी आणि त्यासुद्धा रस्त्याच्या मधोमध खणण्यात आल्याने रस्त्यांची पार दुर्दशा झालेली आहे. काही ठिकाणी हे काम पूर्ण झाले आहे, पण काही ठिकाणी अजून सुरूच आहे.
फोंड्यात अनेक विकास प्रकल्प उभे राहिले. अद्ययावत आयडी उपजिल्हा इस्पितळ, सरकारी संकुल, राजीव गांधी कला मंदिर, फोंडा शहराला मध्यवर्ती ठेवून उभारलेले बगलमार्ग, कुर्टीतील क्रीडांगण प्रकल्प, जलतरण तलाव अशी किती तरी कामे झाली. पण सध्‍याच्‍या कामांमध्‍ये नियोजनाचा पूर्ण अभाव दिसतोय.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.