गोव्याच्या सीमा खुल्या करण्यापूर्वी कोविड चाचणीची सोय करा

मडगाव: गोव्यात (Goa) कोविडचे (Covid) रुग्ण कमी होत आहे. याच पार्श्वभूमीवर गोवा सरकार (Government) राज्याच्या सीमा (Border) परराज्यातील लोकांना खुल्या करू पाहत असल्याच्या पार्श्वभूमीवर आधी सीमांवर सुसज्ज अशी कोविड चाचणी केंद्रे सुरू करा आणि नंतरच सीमा खुल्या करा, अशी मागणी काँग्रेसने (Congress) मुख्यमंत्री डॉ. प्रमोद सावंत (CM Pramod Sawant) यांच्याकडे केली आहे.

काँग्रेस प्रदेश समितीचे उपाध्यक्ष संकल्प आमोणकर आणि सरचिटणीस जना भंडारी यांनी मुख्यमंत्री आणि इतर संबंधितांना याबाबतीत पत्र लिहून जर सरकारने घाईघाईने कोणताही निर्णय घेतला, तर काँग्रेस त्याला विरोध करेल, असे म्हटले आहे.

गोव्यात 31 जुलैपर्यंत सर्वांना कोविडची एक लस देण्याचे उद्दिष्ट पूर्ण होऊ शकलेले नाही तसेच केरळमध्ये कोविड रुग्ण वाढत आहेत या पार्श्वभूमीवर सीमा खुल्या करण्याची घाई नको, असे त्यांनी म्हटले आहे. गोव्यात कोविडचा प्रसार होऊ नये यासाठी कसिनो, खनिज वाहतूक, कोळसा वाहतूक यासारखे उपक्रम बंद ठेवावेत, तसेच सध्या प्राधान्यक्रम नसलेले प्रकल्प बंद ठेवून तो पैसा राज्यातील इस्पितळे सुसज्ज करण्यासाठी व वैद्यकीय सुविधा वाढविण्यासाठी करावा असे म्हटले आहे.

कोविड, तौक्ते वादळ आणि नुकताच आलेला पूर यामुळे ज्या कुणाला आर्थिक झळ बसलेली आहे, त्यांना मदत करण्यासाठी राज्यात आपत्ती निवारण निधी स्थापन करून मदत करावी, अशी मागणीही करण्यात आली आहे.