मडगावच्या धोकादायक पदपथांना रेलिंग घालण्याची सूचना

मडगाव : हॉस्पिसियो हॉस्पिटल ते रेल्वे उड्डाणपूल दरम्यानच्या रस्त्याचे हॉटमिक्स डांबरीकरण करताना पूर्वीचा डांबराचा थर काढून न टाकल्याने रस्त्याची उंची काही ठिकाणी पादचाऱ्यांना चालण्यासाठी जे पदपथ बांधले होते त्यांच्या बरोबरीने आल्याने हे पदपथ चालण्यासाठी धोक्याचे बनले असून त्यावर उपाय म्हणून अशा सर्व पदपथाना आता रेलिंग घालून लोकांना सुरक्षा देण्याचा उपाय घेण्यात आला आहे.

मडगावचे आमदार दिगंबर कामत (Digambar Kamat) यांनी आज सार्वजनिक बांधकाम खात्याचे अधिकारी आणि वाहतूक पोलीस यांच्याबरोबर या रस्त्याची पाहणी केली. या पदपथावर सुरक्षा रेलिंग न बसविल्यास गाड्या पदपथावर चढून अपघात होऊ शकतात याकडे त्यांनी लक्ष वेधले.

यावेळी सार्वजनिक बांधकाम खात्याच्या अधिकाऱ्यांना कामत यांनी सूचना करताना, यापुढे मडगावमध्ये (Madgaon) असे हॉटमिक्स डांबरीकरण करताना रस्त्यावरील (Road) जुन्या डांबराचा थर खरवडून काढून नंतरच हॉटमिक्स त्यावर घालावे असे सांगितले. आपण तशी लेखी सूचना खात्याला करणार असल्याचे त्यांनी सांगितले.