दिगंबर कामत काँग्रेसवर 'नाराज' असल्याची चर्चा

पणजी: काँग्रेसच्या विधिमंडळ पक्षाच्या नेतेपदी मायकल लोबो तर प्रदेशाध्यक्षपदी अमित पाटकर यांना नेमले आहे. मात्र, निवडीच्या वेळी पक्षश्रेष्ठींनी आपल्याला विश्‍वासात घेतले नाही, या कारणास्तव ज्येष्ठ नेते दिगंबर कामत यांनी आक्रमक पवित्रा घेतला आहे. पत्रक पाहूनच ही गोष्ट समजल्याने त्यांनी निकटच्या सहकाऱ्यांकडे याबाबतची व्यथा बोलून दाखवली आहे.

मिळालेल्या माहितीनुसार, काँग्रेस समर्थकांनी दोन दिवसांपूर्वी कामत यांच्या निवासस्थानी धडक दिली. मडगावच्या नेत्याने पक्षश्रेष्ठींना जाब विचारावा आणि या अपमानाचा बदला घेण्यासाठी आमदारकीचाही राजीनामा द्यावा, अशी समर्थकांची इच्छा होती.

यावेळी कामत यांनी व्यथा व्यक्त केली. ते म्हणाले, ‘मी 2022 च्या विधानसभा निवडणुकीत पक्षाचे हिमतीने सारस्थ केले. निधी गोळा करून तो उमेदवारांना पोचवला. अनेक मतदारसंघांत कार्यकर्त्यांच्या भेटीगाठी घेत सभाही संबोधित केल्या. या निवडणुकीत आक्रमकरीत्या पक्षाचे नेतृत्व करणे आवश्‍यक होते आणि मी त्याकामी किंचितही कमी पडलो नाही. तरीही पक्षश्रेष्ठींनी मला विश्‍वासात घेतले नाही.’

पक्षाचे प्रभारी दिनेश गुंडूराव यांनीच या प्रकरणात महत्त्वाची भूमिका बजावली. निवड जाहीर करण्यापूर्वी माजी प्रदेशाध्यक्ष गिरीश चोडणकर यांना दिल्लीला बोलावून घेण्यात आले होते, अशी माहिती सूत्रांनी दिली. गेले दोन दिवस कामत आमदारकीचा राजीनामा देणार असल्याच्या अफवा पसरल्या आहेत. त्यांनी भाजप नेत्यांशी संपर्क साधला असल्याचीही चर्चा आहे. कामत यांच्या निकटवर्तीयांनी मात्र या केवळ अफवा असल्याचे मत व्यक्त केले.

कोणत्या निकषावर निवड?

काँग्रेसचे 22 जरी आमदार जिंकून आले असते तरी त्यांनी मला विधिमंडळ पक्षाचा नेता बनवले नसते अशी तिखट प्रतिक्रिया पक्षाच्या या पवित्र्याबद्दल त्यांनी व्यक्त केल्याचे समजते. काँग्रेसचे प्रभारी दिनेश गुंडूराव यांनी कोणत्या निकषावर नेत्यांची निवड केली त्याबाबत बरीच मासलेवाईक चर्चा गोव्यात सुरू आहे.