जांबावलीत तब्‍बल 16 किलो सोन्याची शिबिका तयार करण्यात आली

केपे : जांबावली येथील श्री रामनाथ दामोदर संस्थानात आणलेल्या सुवर्ण शिबिकेचा समर्पण सोहळा सोमवार दि. 20 डिसेंबर रोजी गोकर्ण पर्तगाळ मठाधीश श्रीमद्‌ विद्याधीश तीर्थ श्रीपाद वडेर स्वामीजींच्या हस्ते पार पडला. तब्‍बल 16 किलो सोने वापरून तयार करण्यात आलेली ही शिबिका पाहाण्यासाठी जांबावलीत हजारो भाविकांची एकच गर्दी उसळली होती. त्‍यात गोव्‍याबरोबरच (Goa) महाराष्‍ट्र (Maharashtra) आणि कर्नाटकातील (Karnataka) भाविकांचाही समावेश होता. या उत्‍सवाला जणू गुलालोत्‍सवाचे स्‍वरूप प्राप्‍त झाले होते.

दुपारी 2 वाजता स्वामींचे आगमन झाल्यानंतर दर्शन, आशीर्वचन झाले. त्‍यानंतर संध्‍याकाळी 4.30 वाजता सुवर्ण शिबिकेचा समर्पण सोहळा मंत्रघोषात पार पडला. यावेळी श्री दामोदर देवाला सुवर्ण शिबिकेत बसवून श्री रामनाथ देवाच्या भेटीसाठी नेण्‍यात आले. नंतर मंदिराला वळसा घालून पालखीचा समारोप कार्यक्रम झाला. संध्याकाळी 7 वाजता पं. अजित कडकडे यांचा भक्तिगीतांचा कार्यक्रम पार पडला. त्‍यासही रसिकांचा उदंड प्रतिसाद मिळाला.