Davorlim Murder Case: सादिक बेल्लारी खून प्रकरणात तिसऱ्या संंशयिताला अटक; खूनाचा कट रचल्याचा आरोप

Davorlim Sadiq Bellary Murder Case: भावाच्या खूनाचा बदला घेण्यासाठी संशयित कादर खान याने सादिकचा खून केला होता. या प्रकरणात दोघा संशयितांना कर्नाटकातील बंकापूर येथून अटक करण्यात आली होती. दरम्यान या प्रकरणात आणखी एका संशयिताच्या मुसक्या आवळण्यात पोलिसांना यश आले आहे.

याबाबत अधिक माहिती अशी की, भावाच्या खूनाचा बदला घेण्यासाठी सादिक बळ्ळारीला कायमचा संपवण्याचा निर्णय संशयित कादर खान याने घेतला होता. यासाठी त्‍याने तीन वर्षांपूर्वीच कोयता विकत घेऊन ठेवला होता.

याच कोयत्याने त्‍याच्‍या भावाचा मारेकरी सादिक बळ्‍ळारी हा एकटाच घरी असल्‍याचे दिसून आल्‍यावर त्‍याने मित्र तौसिफ कडमणी ऊर्फ टायगर याला साथीला घेऊन सादिकचा काटा काढला अशी माहिती पोलिस तपासात पुढे आली आहे.

दरम्यान या प्रकरणात पोलिसांनी दोघा संशयितांना कर्नाटक येथून ताब्यात घेतले. तर आज मायणा-कुडतरी पोलिसांनी सादिकच्या हत्येचा कट रचल्याप्रकरणी राहिल पानवाला या तिसऱ्या संशयिताला अटक केली आहे.