‘एसजीपीडीए’त मागील अध्यक्षांच्या कार्यकाळात गैरव्यवहार!

मडगाव : येथील एसजीपीडीएच्या व्यवहारात गत अध्यक्षांच्या कार्यकाळात मोठ्या प्रमाणावर घोळ झाल्याचे उघडकीस आले आहे. या प्रकारामुळे प्राधिकरणाचे नवीन अध्यक्ष दाजी साळकर यांनाही धक्का बसला आहे. एसजीपीडीएच्या तिजोरीत जो महसूल जमा होणे अपेक्षित होते तेवढा जमाच झाला नसल्याचे उघड झाले असून. या साऱ्या व्यवहाराची चौकशी केली जाणार असल्याचे साळकर यांनी सांगितले.

प्राधिकरण मंडळाची पहिली बैठक काल गुरुवारी झाली त्यानंतर पत्रकारांशी बोलताना साळकर यांनी प्राधिकरणात घोळ झाल्याचे मान्य केले. त्याला जबाबदार कोण हे सांगणे कठीण असले तरी त्यावेळी प्राधिकरणात जे अधिकारी होते त्यांनी हे होऊ कसे दिले याचेच आश्चर्य वाटते असे साळकर म्हणाले.

एसजीपीडीएच्या सोप्याची पावणी करण्याचे स्पष्ट आदेश उच्च न्यायालयाने दिलेले असतानाही मागच्या अध्यक्षांच्या कार्यकाळात एका खासगी कंत्राटदाराकडून ही वसुली केली जात होती. त्याने ज्या प्रमाणात वसूली केली त्या प्रमाणात प्राधिकरणाच्या तिजोरीत पैसा जमा केलाच नाही असे उघड झाले आहे. त्यामुळे प्राधिकरणाची स्थिती सध्या उत्पन्न कमी आणि देय रक्कम ज्यादा अशी परिस्थिती झाली आहे. या प्रकारामुळे प्राधिकरण आर्थिक अडचणीतही आले आहे.

सध्या प्राधिकरणाचे मासळी मार्केटमध्ये वापरलेल्या पाण्याचे लाखो रुपयांचे बिल देणे बाकी आहे. ही बिले त्यावेळीच का फेडली नाहीत याबद्दल साळकर यांनी आश्चर्य व्यक्त केले. सरकारने आम्हाला या प्राधिकरणावर काही तरी चांगले काम करण्यासाठी पाठविले आहे. निदान यापुढे तरी आम्ही प्राधिकरणाचा फायदा कसा होईल तसेच निर्णय घेऊ, असे दाजी साळकर म्हणाले.

विक्रेत्याकडून सोपोची वसुली आता प्राधिकरणाद्वारेच करण्याचा आम्ही निर्णय घेतला आहे, असे दाजी साळकर यांनी सांगितले. सांगितले. धाऊक आणि किरकोळ मासळी मार्केट बांधकाम हाती घ्या अशी सूचना करीत पार्किंग सुविधाही चांगल्या करण्यावर प्राधिकरणाने भर देण्याचे ठरविले आहे, असे दाजी साळकर यांनी सांगितले.