Cooch Behar Trophy: गोव्याला कमजोर फलंदाजी नडली; मुंबईचा डावासह 12 धावांनी दणदणीत विजय

Cooch Behar Trophy 2023: गोव्याचे कमजोर फलंदाजीचे दुखणे कायम राहिल्यामुळे कुचबिहार करंडक १९ वर्षांखालील क्रिकेट स्पर्धेत सलामीलाच मोठा पराभव पत्करावा लागला. मुंबईने चार दिवसीय सामना रविवारी तिसऱ्याच दिवशी डाव व १२ धावांनी जिंकून बोनस गुणाची कमाई केली.

कांदिवली-मुंबई येथील सचिन तेंडुलकर जिमखाना मैदानावर झालेल्या लढतीत गोव्याचा दुसरा डाव रविवारी १९० धावांत आटोपला. गोव्याचा पहिला डाव २०१ धावांत आटोपल्यानंतर मुंबईने २०२ धावांच्या आघाडीसह प्रतिस्पर्ध्यांवर फॉलोऑन लादला होता.

शनिवार दिवसअखेर गोव्याने दुसऱ्या डावात ४ बाद ११० धावा केल्या होत्या. या धावसंख्येवरून त्यांचा दुसरा डाव १९० धावांत संपुष्टात आला.

शंतनू नेवगी कालच्याच ४६ धावांवर बाद झाल्यानंतर गोव्याचे फलंदाज नियमित अंतराने बाद होणे कायम राहिले.

अकराव्या क्रमांकावरील स्वप्नील गावकर याने ३९ चेंडूंत ३९ धावा केल्यामुळे गोव्याला डावाचा पराभव टाळण्याची संधी प्राप्त झाली, मात्र रुद्रेश शर्मा बाद झाल्यामुळे शेवटच्या विकेटची ४५ धावांची भागीदारी संपुष्टात आली आणि मुंबईला पुन्हा फलंदाजीस उतरावे लागले नाही.

पुढील सामना घरच्या मैदानावर

गोव्याचा स्पर्धेतील पुढील सामना घरच्या मैदानावर होईल. २४ नोव्हेंबरपासून सांगे येथील जीसीए मैदानावर त्यांचा सामना चंडीगडविरुद्ध होईल. चंडीगडच्या खाती सात गुण आहेत.

त्यांनी पहिल्या लढतीत त्रिपुरा संघावर डाव व २३६ धावांनी मोठा विजय प्राप्त केला. त्यामुळे गोव्यासमोर खडतर आव्हान असेल.

संक्षिप्त धावफलक

मुंबई, पहिला डाव ः ९ बाद ४०३ घोषित.

गोवा, पहिला डाव ः २०१ व दुसरा डाव (४ बाद ११० वरून) ः ५६.१ षटकांत सर्वबाद १९० (शंतनू नेवगी ४६, जीवन चित्तेम २०, पुंडलिक नाईक ४, कौस्तुभ पिंगुळकर १०, युवराज सिंग ५, रुद्रेश शर्मा ५, स्वप्नील गावकर नाबाद ३९, उमर खान ३०-२, मनन भट ४०-३, अथर्व भगत ४१-२).