मडगाव : काँग्रेस - फॉरवर्ड युतीत सांत आंद्रे आणि काणकोण या दोन जागा गोवा फॉरवर्डला सोडाव्यात या मागणीला काँग्रेसकडून आज केराची टोपली दाखविण्यात आली. या दोन्ही जागांबद्दल काँग्रेसने गोवा फॉरवर्डला शेवटी ठेंगाच दाखविला.
सांत आंद्रे मतदारसंघात काँग्रेसने टोनी फेर्नांडिस याना तर काणकोण मतदारसंघात जना भंडारी याना उमेदवारी जाहीर केली. या दोन्ही मतदारसंघात गोवा फॉरवर्डने अनुक्रमे जगदीश भोबे आणि प्रशांत नाईक यांना उमेदवार म्हणून लोकांसमोर आणले होते. या घडामोडी नंतर भोबे यांनी फॉरवर्डला रामराम ठोकत तृणमुल पक्षात प्रवेश केला. एव्हढा मोठा आघात होऊनही गोवा फॉरवर्डवर मात्र मूग गिळून गप्प बसायची पाळी आली आहे.
गोवा फॉरवर्डने काँग्रेसकडे फातोर्डा, मये, सांत आंद्रे, काणकोण व मांद्रे अशा पाच जागा मागितल्या होत्या. त्यापैकी फातोर्डा व मये या दोन जागा त्यांना यापूर्वीच देण्यात आल्या आहेत. मांद्रे मतदारसंघा बद्दल अजून निर्णय व्हायचा आहे.
दरम्यान, काँग्रेसच्या या निर्णयावर गोवा फॉरवर्डने (Goa Forward) आज मडगावात झालेल्या पक्षाच्या बैठकीत तीव्र नापसंती व्यक्त केल्याची माहिती पक्षाचे उपाध्यक्ष दिलीप प्रभुदेसाई यांनी दिली. आम्हाला न विचारता काँग्रेसने सांत आंद्रे व काणकोण बद्दल निर्णय घेणे गैर होते असे आम्हाला वाटते असे ते म्हणाले.
आम्ही आमचे म्हणणे काँग्रेस (Congress) समोर मांडणार आहोत. भाजपला (BJP) सत्तेबाहेर ठेवण्यासाठी आम्ही काँग्रेसकडे युती केली आहे. भाजपला सत्तेबाहेर ठेवण्यासाठी कसल्याही तडजोडी करण्यास आम्ही तयार आहोत. पण युतीच्या दुसऱ्या पक्षांकडूनही आम्हाला तीच अपेक्षा होती असे प्रभुदेसाई म्हणाले. असे जरी असले तरी युतीत बाधा येणार नाही. कारण भाजपला सत्तेबाहेर करून गोवेकारांना चांगले शासन देणे हे मोठे उद्दिष्ट साध्य करण्यासाठी आम्ही असे त्याग करण्यास तयार आहोत असे ते म्हणाले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
