'जिंकून आल्यावर भाजप सरकारला पाठिंबा देणं हाच काँग्रेसचा डीएनए'

मडगाव : काँग्रेसच्या उमेदवरीवर जिंकून आल्यानंतर भाजप सरकारात सामील होणे हाच काँग्रेसचा डीएनए बनला आहे. काल हे मेघालयात घडले उद्या हे निश्चितच गोव्यात घडेल असे प्रतिपादन आपच्या गोवा प्रभारी आतिशी यांनी केले.

चार राज्यात निवडणूक (Election) होत असताना काल मेघालयात 5 काँग्रेस आमदारांनी भाजपात प्रवेश केला आहे, त्या पार्श्वभूमीवर आज घेतलेल्या पत्रकार परिषदेत आतिशी यांनी मायकल लोबो, आवेर्तन फुर्तादो या सारख्या यापूर्वी भाजप (BJP) सरकारात मंत्री असलेल्याना काँग्रेसने (Congress) उमेदवारी दिली आहे.

सांताक्रूझचे काँग्रेस उमेदवार रुडॉल्फ फेर्नांडिस हे भाजपचे पणजीचे उमेदवार बाबुश मोन्सरात यांचे उजवे हात मानले जायचे. हे उमेदवार उद्या जिंकून आले तर भाजपात जाणार नाहीत कशावरून असा सवाल करीत गोव्यात काँग्रेसच्या 17 पैकी 15 आमदारांनी दुसऱ्या पक्षात जाऊन पक्षांतराचा जागतिक विक्रम केला आहे ते विसरू नये असे त्या म्हणाल्या.

फक्त गोवा आणि मेघालयातच नव्हे कर्नाटक, मेघालय, मध्यप्रदेश येथेही हेच झाले आहे. त्यामुळे काँग्रेसला फक्त भाजप सरकार बनवून द्यायला आवडते हे सिद्ध झाले आहे. गोव्यात सासष्टीत भाजपला स्वतःच्या ताकदीवर निवडून येणे शक्य नाही हे माहीत आहे.

त्यामुळेच त्यांनी आवेर्तन फुर्तादो, चर्चिल आलेमाव या सारख्याना दुसऱ्या पक्षाची उमेदवारी देऊन पुढे आणले आहे. जे जिंकून आले तर पुन्हा भाजपातच जातील असा आरोप त्यांनी केला. यावेळी त्यांच्या बरोबर आपचे नुवेचे उमेदवार डॉ. मारियान गुदिन्हो, नावेलीच्या उमेदवार प्रतिमा कुटीन्हो तसेच बाणावलीचे उमेदवार व्हेंझी व्हिएगस हे उपस्थित होते.