'SIR'च्या मुद्द्यावरुन भाजपचा काँग्रेसवर हल्लाबोल; यतिश नाईक म्हणाले, 'हा तर संविधानिक संस्थांवर हल्ला’

पणजी: भारतीय घटनेच्या अखत्यारित राहत निवडणूक आयोग स्वतंत्रपणे मतदान प्रक्रिया राबवत असतो. त्यात काही चुका असतील तर त्या योग्य व्यासपीठावर मांडण्याचा अधिकार सर्वांना आहे; परंतु कॉंग्रेस आणि विरोधातील काही पक्ष वारंवार संविधानिक संस्थावर हल्ला करत नागरिकांमध्ये संभ्रम निर्माण करत असल्याचा आरोप भाजप प्रवक्ते यतीश नाईक यांनी केले.

ते भाजप कार्यालयात आयोजित पत्रकार परिषदेत बोलत होते. यावेळी सिद्धेश नाईक आणि सर्वानंद भगत उपस्थित होते. यतीश नाईक म्हणाले की, पात्र मतदारांची नोंदणी व अपात्र मतदारांची नावे वगळण्यासाठी निवडणूक आयोग ‘एसआयआर’ प्रक्रिया राबवतो. काँग्रेसच्या कार्यकाळातही ही प्रक्रिया राबविण्यात आली होती.

आयोगाने केंद्रापासून बूथस्तरापर्यंत अधिकारी तसेच प्रत्येक पक्षाचे ‘बीएलए’ नियुक्त केले आहेत. ‘एसआयआर’ प्रक्रियेबाबत आक्षेप असल्यास न्यायालयात दाद मागता येते. भाजप विरोधात असतानाही त्याने या प्रक्रियेवर कधी आक्षेप घेतला नव्हता. काँग्रेसकडे ठोस मुद्दे नसल्याने नागरिकांमध्ये संभ्रम निर्माण केला जात आहे.

काँग्रेसची दुहेरी भूमिका

काँग्रेसची केरळ, कर्नाटक, हिमाचल प्रदेश येथे सरकारे आहेत. तेथेही ‘एसआयआर’ प्रक्रिया राबविण्यात आली. तेथे त्यांचे सरकार आले म्हणजे समस्या नाही, अशी दुहेरी भूमिका घेतली जात आहे. देशात संविधानिक संस्थांबद्दल नकारात्मक प्रतिक्रिया पसरविण्यासाठी प्रयत्न केला जातोय. आम्ही या प्रकाराबाबत कॉंग्रेसचा निषेध करत असल्याचे सिद्धेश नाईक यांनी सांगितले.