गोवा लोकसभेसाठी काँग्रेसकडून अद्याप एकाही उमेदवाराची घोषणा अद्याप करण्यात आलेली नाही. भाजपने दक्षिणेतील उमेदवाराची घोषणा केल्यानंतर आज (१८ मार्च) काँग्रेस उमेदवारीची घोषणा करण्याची शक्यता आहे.
दरम्यान, याबाबत दिल्लीत होणारी बैठक रद्द झाल्याने लोकसभेसाठी काँग्रेसकडून कोण उमेदवार असणार यासाठी और थोडा इंतजार करावा लागणार आहे.
मागील काही दिवसांपासून गोव्यात लोकसभेसाठी काँग्रेसचा उमेदवार कोण असणार याचा तिढा कधी सुटणार याबाबत उत्सुकता आहे. उमेदवार निवडीसाठी दिल्लीत आज (सोमवार) बैठक आयोजित करण्यात आली होती.
दिल्लीतील नियोजित बैठक रद्द करण्यात आल्याची माहिती गोवा प्रदेशाध्यक्ष अमित पाटकर यांनी दिली आहे. तसेच, येत्या दोन दिवसांत याबाबत बैठक होईल, असे पाटकर यांनी सांगितले.
भाजपकडून दक्षिणेतील उमेदवाराची घोषणा आज (सोमवारी) केली जाण्याची शक्यता आहे. भाजप दक्षिणेत महिला उमेदवारालाच संधी देऊ शकतो हे जवळपास निश्चित झाले आहे. पण, हा चेहरा कोण असणार याबाबत सस्पेंस कायम आहे.
भाजपचे उत्तरेतील चित्र स्पष्ट झाल्यानंतर काँग्रेस भाजपच्या दक्षिणेतील उमेदवार घोषणेची वाट पाहत आहे. भाजपचे दोन्ही उमेदवार कोण हे समजल्यानंतर काँग्रेस उमेदवारांची घोषणा करेल.
काँग्रेस दक्षिणेत विद्यमान खासदार फ्रान्सिस सार्दिन यांच्या उमेदवारीचा विचार करत आहे. मात्र, त्यांच्या उमेदवारीला इंडिया आघाडीच्या घटक पक्ष गोवा फॉरवर्डकडून विरोध होताना दिसत आहे. तर, उत्तरेत काँग्रेसचा चेहरा कोण असणार याबाबत कोणी एक नाव आघाडीवर नसल्याने पक्षाकडून धक्कातंत्राचा अवलंब केला जाण्याची शक्यता वर्तवली जात आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.