Goa Congress:...तर दोन दिवसांत गोव्यात काँग्रेसचे सरकार; विरोधीपक्षनेते आलेमाव यांनी सांगितले गणित

Goa Congress

यावेळी देशात चारशे पारचा नारा देणाऱ्या एनडीए आघाडीच्या हाती निराशा आली आहे. भाजपच्या अनेक बड्या नेत्यांना पराभवाचा सामना करावा लागला.

केंद्रात भाजप पुन्हा सत्ता स्थापन करण्याची तयारी करत असताना इंडिया आघाडी देखील सरकार स्थापनेसाठी चाचपणी करत आहे. अशात गोव्याचे विरोधीपक्षनेते युरी आलेमाव यांनी गोव्यात दोन दिवसांत काँग्रेसचे सरकार स्थापन होऊ शकते, असे म्हटले आहे.

देशात भाजपप्रणित एनडीए आघाडीला 292 जागा मिळाल्या आहेत तर, विरोधकांच्या इंडिया आघाडीला 232 जागा मिळाल्या आहेत. नरेंद्र मोदी येत्या आठ जूनला तिसऱ्यांदा पंतप्रधान पदाची शपथ घेतील. एनडीएच्या सरकार स्थापनेच्या तयारीत इंडिया आघाडी देखील सत्तेची गणितं तपासून पाहत आहे.

दरम्यान, केंद्रात इंडिया आघाडीचे सरकार आल्यास गोव्यात दोन दिवसांत काँग्रेसचे सरकार स्थापन होईल, असा दावा विरोधीपक्षनेते युरी आलेमाव यांनी केला आहे.

इंडिया आघाडी देशात सरकार स्थापन करेल याबाबत आम्हाला विश्वास आहे. आणि असे झाल्यास पुढील दोन दिवसांत काँग्रेस गोव्यात सरकार स्थापन करेल, असे आलेमाव म्हणाले.

जनतेने दिलेला कौल भाजपच्या तोंडावर जोरदार चपराक असल्याची टीका देखील आलेमाव यांनी यावेळी केली.

केंद्रातील सत्ता स्थापनेत चंद्रबाबू नायडू आणि नितीश कुमार सध्या निर्णायक असून, ते एनडीए सोबत असल्याने मोदी पुन्हा पंतप्रधान होणार हे जवळपास निश्चित आहे.

दरम्यान, गोव्यात भाजप आणि काँग्रेसने त्यांचे त्यांचे गड राखण्याचे काम केले असून, दोघांनी दोन्ही जागेवरील विजयाचा व्यक्त केलेला विश्वास फोल ठरला आहे. भाजप दक्षिणेची लढत प्रतिष्ठेची केली होती, त्याठिकाणी धेंपे यांना विक्रमी मते मिळाली असली तरी विरियातो यांनी विजयश्री खेचून आणला.