खंवटे यांना दिलासा; खंडपीठाकडून तक्रार आणि आरोपपत्र रद्द

Panjim: माजी अपक्ष आमदार रोहन खंवटे यांच्‍याविरोधात भाजपचे प्रवक्ते प्रेमानंद म्हांबरे यांनी धमकावल्याप्रकरणी तक्रार दाखल केली होती. ही तक्रार व पोलिसांनी सादर केलेल्या आरोपपत्राला खंवटे यांनी मुंबई उच्च न्यायालयाच्या गोवा खंडपीठात आव्हान दिले होते. त्यावर आज गोवा खंडपीठाने ही तक्रार व आरोपपत्र रद्दबातल ठरवण्याचा निवाडा दिला आहे. त्यामुळे काही दिवसांपूर्वीच भाजपमध्ये प्रवेश केलेल्या खंवटे यांना मोठा दिलासा मिळाला आहे.

याचिकादार खंवटे (Rohan Khaunte) यांच्याविरुद्ध पर्वरी (Porvorim) पोलिसांनी भादंसंच्या कलम 323 खाली गुन्हा दाखल केला आहे, तो अदखलपात्र आहे व त्या आरोपाखाली तपास करण्यास पोलिसांना न्यायदंडाधिकाऱ्यांच्या आदेशाशिवाय परवानगी नाही. त्यामुळे पोलिसांनी दाखल केलेला हा गुन्हा रद्दबातल ठरविण्यात येत आहे. त्याचबरोबर या गुन्ह्याच्या आधारे न्यायालयात (Court) दाखल केलेले आरोपपत्रही रद्द करण्यात येत आहे. त्यामुळे या निवाड्यानुसार न्यायालयातील सुनावणी बंद करण्यात येत आहे. तपास अधिकारी कायदा कलम 323 नुसार पुढील कारवाई करू शकतात, असे निरीक्षण गोवा खंडपीठाने निवाड्यात केले आहे.

रोहन खंवटे यांच्याविरुद्ध म्हांबरे यांनी पत्रकार परिषदेत आरोप केले होते. पर्वरी सचिवालयात जात असताना त्यांची गाठ खंवटे यांच्याशी आवारात पडली. त्यावेळी खंवटे यांनी म्हांबरे यांना जाब विचारत त्यांचा हात पकडला होता. या घटनेप्रकरणी म्हांबरे यांनी खंवटे यांच्याविरुद्ध तक्रार दाखल केली. पर्वरी पोलिसांनी गुन्हा दाखल करून न्यायालयात आरोपपत्र दाखल केले होते. त्याला खंवटे यांनी आव्हान दिले होते.