Goa Investment: गोव्यात गुंतवणूकीसाठी मुख्यमंत्र्यांची 'अमेझिंग' चर्चा! 'दुबई आयकॉन्स'ला खास निमंत्रण

Pramod Sawant Aims to Attract More Investments from Dubai

पणजी: गोव्यात गुंतवणूक वाढवण्याच्या उद्देशाने मुख्यमंत्री डॉ. प्रमोद सावंत यांनी दुबईच्या आयकॉन्सच्या शिष्टमंडळासोबत भेट घेतली. या बैठकीत आगामी ८ ते १० नोव्हेंबरला आयोजित होणाऱ्या ‘अमेझिंग गोवा’ जागतिक व्यवसाय परिषदेच्या विविध पैलूंवर चर्चा करण्यात आली.

मुख्यमंत्र्यांनी दुबई आयकॉन्स समूहातील उद्योजक आणि गुंतवणूकदारांना या परिषदेला उपस्थित राहून गोव्यात गुंतवणूक करण्याचे निमंत्रण दिले, तसेच त्यांनी पंतप्रधान मोदींच्या ‘मेक इन इंडिया’ मोहिमेला पूरक ठरत गोवा सरकार ‘मेक इन गोवा’ उपक्रमावर भर देत असल्याचेही नमूद केले.

बैठकीला उद्योग सचिव स्वेतिका सचन, गोवा पर्यटन संचालक सुनील अंचिपका, उद्योगाचे विशेष अधिकारी मनोज पाटील आणि व्हायब्रंट गोवा फाउंडेशनचे अध्यक्ष राजकुमार कामत, व्हायब्रंट गोवा फाउंडेशनचे अध्यक्ष अरमान बंक्ले, अमेझिंग गोवाचे अध्यक्ष विनय वर्मा, बीएमआर इनोव्हेशन्सचे मुख्य कार्यकारी अधिकारी डॉ. श्रीधर बेवारा आणि व्हायब्रंट गोवा फाउंडेशनचे इतर अधिकारी उपस्थित होते.

चर्चेचे प्रमुख मुद्दे

गोवा सरकार व्यवसायासाठी अनुकूल वातावरण तयार करण्यासाठी प्रयत्नशील.

पर्यटन, तंत्रज्ञान, उत्पादन, आरोग्यसेवा इत्यादी क्षेत्रांमध्ये गुंतवणुकीच्या अनेक संधी उपलब्ध

गोवा सरकार दुबईच्या आयकॉन्ससारख्या गुंतवणूकदारांसोबत सहकार्य करण्यास उत्सुक

अमेझिंग गोवा परिषदेत गुंतवणूकदारांना गोव्यातील संधींची माहिती देण्याचे आश्वासन