फक्त नांवा खातीर नोंदणी जाल्ल्या राजकी पक्षांचेर कारवाय करपाचे संकेत केंद्रीय वेंचणूक आयोगान दिल्यात. हाका लागून गोंयांतल्या 10 नोंदणी-कृत पक्षांचेर कारवाय जावपाची शक्यताय आसा. जे पक्ष वेंचणुकेंत वांटो घेनात, तशेंच खर्चाचो तपशील सादर करीनात, तांचेर कारवाय करपाचे संकेत केंद्रीय वेंचणूक आयोगान दिल्यात. गोंयांत 10 नोंदणी-कृत आनी मान्यताय नाशिल्ले राजकी पक्ष आसात. ह्या सगल्यांची नोंदणी रद्द जावपाची शक्यताय आसा. गोंय राष्ट्रवादी पक्ष, गोवा विकास पक्ष, युनायटेड गोवन्स डेमोक्रॅटीक पार्टी, सत्तरी युवा मोर्चा, गोवा प्रजा पार्टी, गोवा सुराज पार्टी, गोवा सुरक्षा मंच, नीज गोंयकार रिव्होल्युशन फ्रंन्ट, युनायटेड गोवन्स पार्टी, गोंयकारांचो आसरो ह्या पक्षांची नोंदणी आसा.
विधवांक मान मेळचो हे खातीर घरकाराच्या मरणा उपरांत विधवांक हेडावचें न्हय, हे खातीर गैर प्रथा बंद करची, असो विधवा प्रथे आड क्रांतिकारक थाराव कोरगांव ग्रामसभेंत मंजूर केलो. ते भायर धारगळ ग्रामसभेंत लेगीत अशेच तरेचो थाराव मंजूर केला. कोल्हापूरांतल्या हेरवाड गांवांतले पंचायतीन विधवा प्रथे आड थाराव मंजूर केले उपरांत हो विशय पुराय देशांत चर्चेक आयिल्लो. ताचो एक वांटो म्हूण कोरगांव ग्रामसभेंत आदली सरपंच तशेंच सध्याची पंच स्वाती गवंडी हांणी हो थाराव मांडलो जाल्यार विनिता मांद्रेकारान ताका अनुमोद दिलें.
अंदूं वर्साचो काजू पिकाचो season निमाणे एकदाचो सोपलो. काजू seasonना वांगडाच दिवचल म्हालात वेगवेगळ्या वाठारांत सोरो काडपाचो वेवसाय लेगीत बंद जालो. फाटल्या सुमार तीन म्हयन्यांच्यान पेटपी सोऱ्याच्या भाटयांचो उजोय आता पालावला. अस्तते कडल्या हवामान तातुंत अदी मदी आडवेळ्या पावसान तडाखो दिल्ल्यान सोरो गाळपाचेर कांय प्रमाणात परिणाम जालो आसलो, तरीय फाटल्या वर्साचें तुळेत अंदूं काजू फेणीचे उत्पादन समाधानकारक मेळळा. अशें सोरो काडपी वेवसायीकांचे म्हण्णे आसा. काजू पीक हो दिवचल म्हालातल्या भोवतेक वाठारांतलो एक मुखेल वेवसाय. सर्वण, मये, कारापूर, नार्वे, धुमासे, कुडचिरे, उसप आनी हेर वाठारांत काजीच्या मुट्टयांपसून हूर्राक आनी फेणी हो सोरो काडटात. कांय उत्पादक वेवसायीक थळाव्या बागायतींतल्यान मेळपी मुट्टयां वांगडाच महाराष्ट्रातल्या वेगवेगळ्या वाठारांतल्यान मुट्टयांची आयात करून सोरो गाळटात. दिवचल म्हालात दर वर्सा काजू फेणीचे उत्पादन तातुंत 50 टक्क्या परस चड उत्पादन हे राज्या भायल्या मुट्टयांपसून मेळटा.
गोंय फुटबॉल संघटनेक उरिल्ले अनुदान बेगीनूच दितलें, मुख्यमंत्री दोतोर प्रमोद सावंतान आश्वासन दिलें. कोरोना म्हामारी आनी हेर कारणाक लागून गोंय फुटबॉल संघटनेक हे अनुदान मेळ्ळे ना. पुण आता परिस्थिती सामान्य जाल्ल्यान जाता तितल्या बेगीन GFAक अनुदान मेळटलें, अशेंय तांचे म्हण्णे. बऱ्यातले बरे खेळगडे तयार करतलें जाल्यार फुटबॉल खेळाक मुळाव्या पांवड्यांर प्रोत्साहन दिवचे पडटलें, अशेंय मुख्यमंत्र्यान ह्यावेळार सांगले. मुसा अलींचे यादिन आयोजित केल्ले तिसरे अखिल गोंय फुटबॉल सर्तीच्या बक्षीश भेटवोन सुवाळ्यात मुख्यमंत्री मुखेल सोयरे म्हुण उलोयतालें. कांदोळी स्पोर्ट्स क्लबान ही सर्त जिखली. फायनलीत ताणी मार्णा शिवोलच्या सेंट अँथनी क्लबाक 2-1 गोल फरकान हारयलो.
गोंयांत पर्यटना खातीर आयिल्ल्या चंदीगड महाराष्ट्रांतल्या 11 तरणाट्यांच्या पंगडाक सवाय भितर खानावळ दाखोवपा निमतान तांकां म्हापशेंच्या मसाज पार्लरांत व्हरून बरेच बडयले. तांच्या आंगा वयल्यो भांगराच्यो वस्ती आनी रोख रक्कम मेळून 1.80 लाखांचो म्हालवज फारायलो. तेच वरी तांचे बायलां वांगडा विवस्त्र अवस्थेंतलें व्हिडियो चित्रिकरण करून धमकी दिली. ह्या प्रकरणांत म्हापशें पुलिसांनी कांय वरां भितर तीन दुबावितांक अटक केली. हें अपहरण आनी लुटमारीचें प्रकरण तीन वरां चलिल्लें. अटक केल्ल्या दुबावितां मदीं सचीन राजकुमार भारद्वाज , आशिष जगीर सिंग आनी मुबारक अली मौला हांचो आसपाव आसा. पुलिसांनी दिल्ले म्हायती प्रमाण ही घडणूक मंगळारा 24 मेक दनपारां 12.30 वरांच्या सुमाराक श्री देव बोडगेश्वर देवळा लागसार घडली. ह्या प्रकरणांत फिर्यादी प्रवीण पांडुरंग पाटील ह्या विद्यार्थ्यान आयतारा 29 मेक सकाळीं पुलिशेंत कागाळ केली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
