पणजी : राज्यात खाणबंदीच्या काळात बेरोजगार झालेल्या 6999 खनिजवाहू ट्रक चालकांना 148 कोटी रुपयांची मदत दिली गेली. तसेच खाणग्रस्तमुळे बेरोजगार झालेल्या सुमारे 2000 कर्मचाऱ्यांना 15 कोटींची भरपाई देण्यात आल्याची माहिती मुख्यमंत्री डॉ. प्रमोद सावंत यांनी आज विधानसभेत आतारांकित प्रश्‍नावरील लेखी उत्तराद्वारे दिली आहे.
काँग्रेस आमदार दिगंबर कामत यांनी राज्यातील खाण व्यवसायासंदर्भात स्थितीची माहिती प्रश्‍नाद्वारे विचारली होती. ‘खाण व्यवसाय कायदेशीरपणे तसेच शाश्‍वत खाणी सुरू करण्यासाठी काही पावले उचलण्यात आली आहेत व यासंदर्भात महाधिवक्ता यांचा सल्ला घेण्यात आला आहे. तसेच खाणी सुरू न झाल्यास आर्थिक सहाय्य देण्याची योजना पुढे सुरू ठेवण्याचा सरकारचा विचार आहे का?’ याची माहिती मागितली होती.
खाणबंदीच्या काळात सरकारने या योजनेखाली 2013 ते 2018 या काळात ट्रकचालकांना तसेच बेरोजगार झालेल्या खाण कर्मचाऱ्यांना मदत दिली आहे. ट्रक चालकांना अधिकाधिक सुरुवातीला प्रतिवर्ष 1.44 लाखापर्यंत तर खाण कर्मचाऱ्यांनाही या काळात मदत देण्यात आली.
योजनेला मुदतवाढ देण्याचा प्रश्‍नच नाही
राज्य सरकारने खाणग्रस्तांसाठी मदतनिधी देण्यासाठी 2013 मध्ये योजना जाहीर केली होती. त्यामध्ये खनिजवाहू ट्रक चालक व खाणबंदीचा फटका बसलेल्या कर्मचाऱ्यांचा समावेश केला. योजनेतंर्गत मदतनिधीसाठी अर्ज केलेल्या सर्वांना भरपाई दिली आहे. खाणींचा लिलाव करून खाण व्यवसाय करण्याचा निर्णय सरकारने घेतल्याने या योजनेला मुदतवाढ देण्याचा प्रश्‍न येत नाही असे मुख्यमंत्री सावंत यांनी दिलेल्या लेखी उत्तरात म्हटले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
