CM Pramod Sawant: देशवासीयांनी ‘तुकडे गॅंग’पासून सावध रहावे : मुख्‍यमंत्री सावंत

CM Pramod Sawant: देश स्वतंत्र झाल्यानंतर सर्व राज्यांना एकत्रित आणून हे राष्ट्र संघटित करण्याचे काम सरदार वल्लभभाई पटेल यांनी केले. म्हणूनच आज हा देश संघटित आहे. आज देशाचे विभाजन करण्यासाठी काहीजण वावरत आहे,

अशा ‘तुकडे गँग’ च्या कारवायांपासून सावध राहून देशाची अखंडता जपण्यासाठी प्रत्येकाने शपथबध्द व्हावे, असे आवाहन मुख्यमंत्री डॉ. प्रमोद सावंत यांनी साखळी येथे आयोजित राष्ट्रीय एकता दौडमध्ये केले.

भारत देश आज आपल्या स्वातंत्र्याचा अमृतकाल साजरा करीत असतानाही या देशात ‘तुकडे गँग’ काही राज्यांना देशापासून वेगळे करण्याच्या प्रयत्नात आहेत. त्यांच्या या प्रयत्नांना अपयशी करून हा भारत देश अखंडित राखण्याचे काम आज पंतप्रधान नरेंद्र मोदी यांनी केले आहे. असेही मुख्यमंत्री डॉ. प्रमोद सावंत पुढे म्हणाले.

क्रीडा व युवा व्यवहार संचालनालयतर्फे साखळी बसस्थानक ते रवींद्र भवन अशी राष्ट्रीय एकता दौड आयोजित केली होती. त्यात मुख्यमंत्री डॉ. प्रमोद सावंत यांच्यासह नगराध्यक्षा रश्मी देसाई, उपनगराध्यक्ष आनंद काणेकर, नगरसेवक दयानंद बोर्येकर, निकीता नाईक व इतरांची उपस्थिती होती.