मडगावात कार्निव्हलनिमित्त विविधांगी कार्यक्रमांची रेलचेल

मडगाव : मडगाव नगरपालिकेने यंदा कार्निव्हल निमित्त 25 आणि 26 फेब्रुवारी असे दोन दिवस विविधांगी कार्यक्रमांचे आयोजन केले आहे. मुख्य अधिकारी आग्नेल फर्नांडीस यांनी कार्निव्हलच्या आयोजनाबाबत माहिती दिली. मडगावातील कार्निव्हल हा वैविध्यपूर्ण कार्यक्रमांनी नटलेला असेल असंही त्यांनी सांगितलं. (Carnival in Madgaon News Updates)

मडगावमध्ये (Madgaon) कार्निव्हलवेळी शुक्रवारी 25 रोजी अॅड. जॉन फर्नांडिस आणि साथीदारांचा कार्यक्रम आयोजित करण्यात आला आहे. यात नाट्य, पारंपरिक नृत्य तसेच घुमट आणि कासाळे वादनाचा समावेश असेल. तर शनिवारी 26 रोजी सां जुझे आरियल येथील दुमिंग मास्कारेन्हस आणि साथीदार जागोर सादर करतील.

दुमिंग हा आघाडीचा प्रसिद्ध आणि ज्येष्ठ पारंपरिक नृत्य कलाकार असून जागोरद्वारे तो गोव्यातील (Goa) कॅथलिक समाजाच्या सांस्कृतिक परंपरेचे जतन करत आहे. दोन्ही दिवस कार्यक्रम संध्याकाळी 5 वाजता सुरु होऊन रात्री दहापर्यंत संपतील. वरील दोन्ही कार्यक्रमांव्यतिरिक्त रविवार 27 रोजी जिल्हा न्यायालय ते बोरकर सुपर मार्केटपर्यंत कार्निव्हल (Carnival) चित्ररथांचे संचलन होईल. याशिवाय वेगवेगळ्या क्षेत्रातील कलाकार आपल्या गायन, वादन कौशल्याचे प्रदर्शनही करणार आहेत.