खंडणी विषय बंद करणाऱ्यांना काहीतरी लपवायचे आहे : फेरेरा

खंडणी ही एक गंभीर बाब आहे आणि खंडणीखोर कोण आहेत, हे सरकारला माहीत असल्याशिवाय कथित रॅकेटचा मुद्दा नगण्य समजू नये. त्याचबरोबर हा विषय बंद झाल्याचा दावा करणाऱ्यांना काहीतरी लपवायचे आहे, असा आरोप आमदार कार्लुस फेरेरा यांनी केला आहे.

राहुल गांधी यांनी, काही दिवसांपूर्वी जम्मू-काश्मीरमध्ये ‘महिलांवर अजूनही लैंगिक अत्याचार केले जात आहेत’, या विधानावर कोणत्याही पीडितेची तक्रार नसताना दिल्ली पोलिसांनी त्यांना चौकशीसाठी बोलावले.

गोव्यात तेजपालच्या प्रकरणात पीडितेची तक्रार न घेताही एफआयआर नोंदविला आणि गोवा पोलिस त्याला अटक करण्यासाठी सरसावले. गोवा पोलिस खंडणी प्रकरणात म्हणूनच कोणतीही तक्रार आलेली नाही!

मायकल लोबो यांनी स्वत:च खंडणी सुरू असल्याचे स्पष्टपणे सांगून हा मुद्दा उपस्थित केला असताना हे प्रकरण बंद झाल्याचा दावा ते कसा करू शकतात? ‘बनावट पत्र’ प्रकरण बंद करण्याचा प्रयत्न करणे, ही एक गोष्ट आहे.

परंतु लोबोंच्या आरोपांचे निराकरण कसे होईल? त्यांचे विधान खोटे होते का? असा सवालही फेरेरा यांनी केला आहे. पोलिसांना गुन्ह्याचा तपास करण्यात किंवा गुन्ह्याची नोंद झाल्यावर ‘सेटिंग'' करण्यात खरोखरच रस आहे काय? अशी शंकाही फेरेरा यांनी उपस्थित केली.

भाजपचे मौन हे गौडबंगाल

सरकारने हे प्रकरण बंद करण्याचा प्रयत्न करू नये. अन्यथा हे रॅकेट अत्यंत उच्च स्तरावर आणि सरकारमधील लोकांच्या संगनमताने कार्यरत आहे, असा निष्कर्ष जनता काढेल. कायदा व सुव्यवस्थेवरही बोट ठेवले जाईल.

हे जर भाजपेतर सरकारच्या बाबतीत घडले असते, तर भाजपने रस्त्यावर उतरून मुख्यमंत्री किंवा गृहमंत्र्यांच्या राजीनाम्याची मागणी केली असती, राज्यभर मोर्चे काढून गदारोळ केला असता. परंतु त्यांचे हे मौन गौडबंगाल वाटते, असेही फेरेरा म्हणाले.