St. Xavier's Exposition: 'या' सरकारकडे इच्छाशक्तीच नाही! 'पोप फ्रान्सिस' मुद्द्यावरून विरियातोंनी सुनावले खडे बोल

St. Xavier's Exposition in Old Goa

सासष्टी: जुने गोवे येथील गोंयच्या सायबाचे पार्थिव दर्शन २१ नोव्हेंबर २०२४ ते ५ जानेवारी २०२५ या कालावधीत होणार आहे. या पार्थिव दर्शनाला पोप फ्रान्सिस यांना पंतप्रधानांमार्फत आमंत्रित करण्यात येणार असल्याचे सरकारतर्फे सांगण्यात आले होते. मात्र, अजून पोप फ्रान्सिस यांना आमंत्रित करण्यात आले नसल्याचे दक्षिण गोव्याचे खासदार कॅप्टन विरियातो फर्नांडिस यांनी आज मडगावात सांगितले.

या संदर्भात विचारलेल्या प्रश्र्नाला उत्तर देताना फर्नांडिस यांनी सांगितले की, आपण आपल्या दिल्लीतील सूत्रांकडून घेतलेल्या माहितीप्रमाणे अजून पोप फ्रान्सिस यांना आमंत्रण पाठविण्यात आलेले नाही, अशी माहिती मिळाली आहे. पोप फ्रान्सिस यांना आमंत्रित करताना काही शिष्टाचार पाळायचे असतात. काही दिवसांपूर्वी पोप फ्रान्सिस पूर्व आशियाई देशांमध्ये येऊन गेले. हे देश भारताच्या अगदी जवळ असल्याने त्यांना आमंत्रित करणे सोपे झाले असते, असेही खासदार फर्नांडिस यांनी सांगितले.

पोपना आमंत्रित करण्यासाठी इच्छाशक्ती पाहिजे, जी या सरकारपाशी नसल्याचेही कॅप्टन विरियातो फर्नांडिस यांनी सांगितले. अजूनही वेळ टळलेली नाही. सरकारला खरोखरच पोपना आमंत्रित करायचे असेल ते त्यांना आतासुद्धा करता येते. मात्र, खोटारडेपणा करू नका, सत्य काय ते लवकरच कळेल, असेही खासदार फर्नांडिस म्हणाले.