एके काळी सासष्टी हा कॉंग्रेसचा बालेकिल्ला होता. पण आता तो राहिलेला नाही. लोकसभा निवडणुकीत संपूर्ण दक्षिण गोव्यात भारतीय जनता पक्षाचाच उमेदवार निवडून येईल, तसेच सासष्टीतही नुवेसह हा उमेदवार आघाडी घेईल, असा विश्र्वास कॉंग्रेसमधून भारतीय जनता पक्षात प्रवेश करून पर्यावरण मंत्री झालेले आलेक्स सिक्वेरा यांनी आज व्यक्त केला.
माथानी साल्ढाणा प्रशासकीय इमारतीत ते म्हणाले, गेल्या विधानसभा निवडणुकीत सासष्टीतील आठ पैकी केवळ तीन मतदारसंघात कॉंग्रेसचा उमेदवार विजयी झाला. दक्षिण गोव्यातील भाजपचा उमेदवार लवकरच जाहीर होईल. केवळ भाजपच्याच उमेदवाराबद्दल एवढी चिंता का? इतर पक्षही आहेत. त्यांची चिंता करा.
उमेदवार केव्हा जाहीर करावा, हे पक्ष ठरवेल. वेळ बदललेली आहे. लोकांना कोण चांगले काम करु शकतो याची जाणीव झाली आहे. पूर्वी कधीही विकास झाला नाही, एवढा विकास गोव्यात मनोहर पर्रीकर मुख्यमंत्री झाल्यापासून झाला असून आता डॉ. प्रमोद सावंत यांच्या नेतृत्वाखाली सुद्धा चालू आहे.
पोर्तुगीज पासपोर्ट प्रश्र्न हा जास्तीत जास्त ख्रिस्ती बांधवाचा आहे. तरी सुद्धा हा प्रश्र्न सुटावा म्हणून प्रयत्न करीत आहे. या संदर्भात त्यांनी गृहमंत्री अमित शाह यांची भेट घेतली, तेव्हा मी पण उपस्थित होते. हा प्रश्र्न निश्र्चितच सुटेल, असा विश्र्वास मंत्री सिक्वेरा यांनी व्यक्त केला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
