Pernem: यापुढे पेडण्यात निवडणुकीत 'त्याग' करणार नाही! बाबू आजगावकरांनी ठोकला शड्डू

Babu Azgaonkar on Pernem Seat: पेडणे हा माझा परंपरागत मतदारसंघ असून येथून मी चार वेळा निवडून आलो आहे. पक्षासाठी हा मतदारसंघ सोडला पण यापुढे असे करणार नाही. पेडण्यातून निवडणूक लढवणार असा निर्धार माजी आमदार आणि भाजप नेते बाबू आजगावकर यांनी व्यक्त केला आहे.

गतवर्षीच गोवा विधानसभेची निवडणूक झाली आहे. त्यामुळे पुढच्या विधानसभा निवडणुकीचा अद्याप बराच अवकाश आहे. पण आत्ताच पेडण्यातून भाजप नेते बाबू आजगावकर यांनी शड्डू ठोकला आहे. त्यांनी निवडणूक लढविणार असल्याचे म्हटले आहे.

बाबू आजगावकर म्हणाले की, पेडणे हा माझा मतदारसंघ आहे. मी या मतदारसंघातून चार वेळा निवडून आलो आहे. आणि मी निवडून आलो आहे ते पक्षामुळे नाही तर बाबू आजगावकर या नावामुळे. मी भाजपचा प्रामाणिक कार्यकर्ता आहे. त्यामुळे मी माझ्या मतदारसंघाचा त्याग केला.

पण, यापुढे हा त्याग करणार नाही. पेडणे ही माझी कर्मभुमी आहे. आणि मी पेडण्यातून निवडणूक लढवणार आहे, असे आजगावकर यांनी स्पष्ट केले.

प्रवीण आर्लेकर हे पेडण्याचे विद्यमान आमदार आहेत. ते देखील भाजपमध्येच आहेत. त्यामुळे आता येथे आगामी काळात भाजपच्याच आजी-माजी आमदारांत संघर्ष पाहायला मिळाला तर आश्चर्य वाटायला नको.