Goa Government: पर्यटनमंत्री रोहन खंवटे यांच्या वाढदिनी दोना पावला जेटीचे नुतणीकरणानंतर उद्घाटन झाले होते. या कार्यक्रमासाठी आमंत्रण न दिल्याने तसेच कार्यक्रम पत्रिकेत साधा उल्‍लेखही नसल्‍यावरून केंद्रीय पर्यटन राज्यमंत्री तथा उत्तर गोव्याचे खासदार श्रीपाद नाईक यांनी उघडपणे संताप व्यक्त केला होता.
त्यानंतर आता राज्य सरकारने कोणत्या कार्यक्रमाला कुणाला बोलवायचे याबाबत एक परिपत्रकच काढले आहे.
राज्य सरकारच्या या नव्या परिपत्रकानुसार एखादे काम जर राज्य सरकारच्या निधीतून झालेला असेल तर त्या कार्यक्रमाला मुख्यमंत्री, इतर मंत्र्यांना निमंत्रण देणे बंधनकारक असेल. तर एखाद्या कामासाठी केंद्राकडून निधी मिळालेला असेल तर त्या कार्यक्रमाला खासदारांना बोलावणे बंधनकारक असेल.
याची अंमलबजावणी काटेकोरपणे होईल, याची काळजी यापुढे घेतली जाणार आहे. उच्च अधिकाऱ्यांचे यावर लक्ष राहणार आहे. खा. श्रीपाद नाईक यांना दोना पावला जेटीच्या उद्घाटनाला आमंत्रण न दिल्यावरून झालेल्या गोंधळामुळे हा निर्णय घेण्यात आला आहे.
दोना पावला जेटीच्या उद्घाटनानंतर श्रीपाद नाईक म्हणाले होते की, खासदाराला निमंत्रण न देणे हे शिष्‍टाचाराच्‍या कोणत्या तत्‍वात बसते ?या प्रकरणी मुख्यमंत्री सावंत व पर्यटनमंत्री खंवटे यांनी लक्ष घालावे.
या प्रकारानंतर पर्यटनमंत्री खंवटे यांनी माफीही मागितली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
