कांदोळीत जळीतकांड, अज्ञाताने दुचाकीच पेटवल्या

पणजी : किनाऱ्यावर लोकांच्या जीवाचं रक्षण करणाऱ्या लाईफगार्ड्सच्या दुचाकी अज्ञाताने जाळल्या आहेत. बुधवारी सकाळी ही घटना घडल्याची माहिती आहे. कांदोळी किनाऱ्यावर लाईफगार्डच्या दुचाकींना अज्ञाताने आग लावल्याने एकच खळबळ उडाली आहे.

कांदोळीत बामनवाडो परिसरात असलेल्या व्हिस्परिंग पाम्स येथे लाईफगार्ड्सच्या दुचाकी जाळण्यात आल्या आहेत. अज्ञाताने हे कृत्य केलं असून बुधवारी सकाळी हे जळीतकांड घडलं आहे. महत्त्वाची गोष्ट म्हणजे दोन दुचाकींमधील पेट्रोल काढूनच इतर सर्व दुचाकी पेटवण्यात आल्या आहेत. लाईफगार्ड्सना राहण्यासाठी दिलेल्या फ्लॅटखालीच या दुचाकी पेटवण्यात आल्या आहेत.

दरम्यान या आग लावण्यामागचं कारण अद्याप समजू शकलेलं नाही. वैयक्तिक वादातून माथेफिरुने या दुचाकी पेटवल्याचा संशय व्यक्त केला जात असून पोलिसात याप्रकरणी तक्रार दाखल करण्यात आली आहे. पोलिसांनी घटनास्थळाचा पंचनामा करुन चौकशी सुरु केली आहे. अज्ञात आग लावणाऱ्या व्यक्तीचा शोध पोलिसांनी सुरु केला आहे.