गोव्यातील दुचाकी चोरीचा अखेर पर्दाफाश

पणजी : गोव्यात दुचाकी चोरीचा पर्दाफाश झाला आहे. आगशी पोलिसांनी एका संशयित चोरट्याला बेड्या ठोकल्या असून त्याच्याकडून तब्बल चार चोरीच्या दुचाकी जप्त करण्यात आल्या आहेत. गोव्याच्या विविध भागातून या दुचाकी चोरल्याची माहिती आहे.

पणजीजवळच (Panjim) असलेल्या आगशी भागातून एका 20 वर्षीय संशयित चोरट्याला पोलिसांनी अटक केली आहे. वाल्लिसन किंडो असं या संशयिताचं नाव असून त्याच्याकडून आतापर्यंत चार दुचाकी पोलिसांनी हस्तगत केल्या आहेत. या सर्व दुचाकी म्हापसा आणि कळंगुट भागातून चोरीस गेल्याची माहिती आहे. पोलिसांनी चोरट्याला अटक करुन तपास सुरु केला आहे. चोरट्याने आणखी दुचाकी (Bikes) चोरल्या आहेत का याचा तपासही पोलिसांनी सुरु केला आहे.

दरम्यान नुकतीच वाडी-शिवोली येथील शेरॉन फर्नांडिस यांनी आपली दुचाकी चोरीस गेल्याची तक्रार शिवोलीच्या आऊट पोस्टवर केली होती. दुचाकी चोरांना आपल्या सहकाऱ्यांनी हणजुणे पोलिस (Police) स्थानकात आणले असता पोलिसांसमक्ष त्यांनी पलायन केल्याचा आरोपही फर्नांडिस यांनी केला होता.