कारापूर येथे झोपडी जळाली...

डिचोली: कारापूर-साखळी येथील एका झोपडीला आग लागून ती भस्मसात होण्याची घटना घडली. अन्य एका घटनेत मये येथे विहिरीत पडलेल्या गायीला जीवदान देण्‍यात आले.

कारापूर तनुजा नाईक या महिलेच्या झोपडीला अचानक आग लागली. आगीत पूर्ण झोपडी जळून खाक झाली. या दुर्घटनेत 20 हजारांहून अधिक रुपयांची हानी झाली. झोपडीला आग कशी लागली, त्याचे कारण समजू शकले नाही. डिचोली अग्निशामक दलाला घटनेची माहिती मिळताच दलाचे अधिकारी श्रीपाद गावस यांच्या मार्गदर्शनाखाली आणि लिडींग फायर फायटर साईनाथ केसरकर यांच्या नेतृत्वाखाली दलाच्या जवानांनी घटनास्थळी धाव घेतली. यू. पी. मांद्रेकर, व्ही. एम. गाड (चालक ऑपरेटर), एस. एल. नाईक, आर. आर. मातोंडकर, आर. एम. एकावडे, आशिष मोर्लेकर, सूरज कुंकळयेकर, एस. व्ही. उसपकर आणि एच. एच. सावंत या जवानांनी मदतकार्यात भाग घेतला.

विहिरीत पडलेल्या गायीला जीवदान

डिचोली अग्निशामक दलाच्या तत्परतेमुळे विहिरीत पडलेल्या एका गायीला जीवदान मिळाले. केळबायवाडा-मये येथे विहिरीत गाय पडल्याची घटना आज सकाळी निदर्शनास आली. घटनेची माहिती मिळाल्‍यावर दलाच्या जवानांनी घटनास्थळी जाऊन गायीला सुखरूप विहिरीबाहेर काढले.