Goa Crime: प्रेमासाठी बिहारहून थेट गोव्यात! प्रेयसीला पटवण्यात अपयश, संतापातून दाम्पत्यावर जीवघेणा चाकूहल्ला; आरोपी वेर्णा पोलिसांच्या जाळ्यात

वास्को : कासावली येथे शनिवारी एका दाम्पत्यावर झालेल्या चाकू हल्ल्यानंतर गोव्यातून पळून जाण्यापूर्वीच बिहारचा रहिवासी असलेल्या आकाश कुमारच्या मुसक्या वेर्णा पोलिसांनी आवळल्या.

रविवारी दुपारी पोलिसांना ही माहिती मिळाली आणि त्यांनी तात्काळ कारवाई केली. पीएसआय महेश भोमकर आणि त्यांच्या पथकाने रुग्णालयात धाव घेतली, जखमी पीडितांचे जबाब नोंदवले
आणि सखोल तपास सुरू केला. पीआय आनंद शिरोडकर यांच्या मार्गदर्शनाखाली काही तासांतच संशयिताचा शोध घेऊन त्याला अटक केली.

पोलिसांच्या माहितीनुसार, संशयित हा तक्रारदाराच्या ओळखीचा होता आणि ही घटना प्रेमत्रिकोणातून घडली असावी, असा संशय आहे. तपासकर्त्यांनी सांगितले की, आकाश कुमार घटनेच्या दोन दिवस आधी तक्रारदाराला आपल्या प्रेमाबद्दल पटवून देण्यासाठी बिहारहून गोव्याला आला होता, असा संशय आहे.

त्याला न्यायालयात हजर केले असता ८ दिवसांची पोलिस कोठडी सुनावण्यात आली. ही घटना शनिवारी (ता. ४ जुलै) सकाळी सुमारे ११ वाजता घडली. पोलिसांना याची माहिती दुपारी १२ च्या सुमारास मिळाली. संशयित आकाश कुमार हा तक्रारदाराच्या भाड्याच्या खोलीत चाकू घेऊन आला आणि त्याने तक्रारदारासह तिच्या पतीला मनगट कापून आत्महत्या करण्याची धमकी दिली.

जेव्हा पतीने त्याला शांत करण्याचा आणि निघून जाण्यास सांगण्याचा प्रयत्न केला, तेव्हा आकाश कुमारने त्याच्यावर चाकूने हल्ला केला, ज्यामुळे त्याच्या मानेच्या डाव्या बाजूला जखमा झाल्या. जेव्हा महिलेने आपल्या पतीला वाचवण्यासाठी हस्तक्षेप केला, तेव्हा तिच्यावरही हल्ला करून संशयित घटनास्थळावरून पळून गेला.

वेर्णा पोलिसांना याची माहिती मिळताच ते घटनास्थळी दाखल झाले. पोलिस उपनिरीक्षक महेश भोमकर आणि त्यांच्या पथकाने तातडीने रुग्णालयात जाऊन पीडितांचे जबाब नोंदविले आणि त्वरित तपास सुरू केला.पोलिस निरीक्षक आनंद शिरोडकर यांच्या मार्गदर्शनाखाली पथकाने कारवाई केली.