एकाच खोलीत बाप-लेकाचा संशयास्पद मृत्यू! डिचोली परिसरात खळबळ; मुलाच्या नाकातोंडातून रक्तस्राव, गूढ वाढले

डिचोली : शहरातील एका भाड्याच्या घरात बाप आणि मुलाचा मृतदेह आढळून आल्याने खळबळ उडाली आहे. मृत बापाचे नाव संजय म्हापसेकर असे असून ते डिचोली भाजप मंडळाचे सरचिटणीस होते. तर, मृत मुलाचे नाव संचित म्हापसेकर असे असून तो शहरातील एका शाळेत इयत्ता नववीत शिकत होता.

नाईकनगर-बोर्डे येथील श्री सिद्धिविनायक मंदिराच्या मागील बाजूस असलेल्या खोलीवजा भाड्याच्या घरात ही घटना घडली. वडिलाने विषप्राशन करून आत्महत्या केल्याचा प्राथमिक संशय व्यक्त करण्यात येत आहे. मात्र १४ वर्षीय मुलाच्या मृत्यूबाबत गूढ निर्माण झाले आहे.

मुलाच्या नाकातोंडातून रक्तस्राव झाल्याचे आढळल्याने मारहाणीमुळे की विषप्राशनामुळे त्याचा मृत्यू झाला, याबाबत संभ्रम निर्माण झाला आहे. घटनास्थळी मुलगा संचित पलंगावर तर वडील संजय पलंगाखाली मृतावस्थेत आढळले, अशी माहिती मिळाली आहे. संजय म्हापसेकर यांच्या पत्नीचे दोन वर्षांपूर्वी निधन झाले होते.

घटना घडली त्यावेळी वडील व मुलगा दोघेच घरात होते. त्यांची मुलगी त्यावेळी शहराबाहेर होती. सायंकाळी ती घरी परतल्यानंतर वडील आणि धाकटा भाऊ घरात मृतावस्थेत पडल्‍याचे निदर्शनास येताच तिने हंबरडा फोडला.

सापडली चिठ्ठी

घटनेची माहिती मिळताच डिचोली पोलिसांनी घटनास्थळी धाव घेत तपास सुरू केला. १०८ रुग्णवाहिकेलाही पाचारण करण्यात आले; मात्र दोघेही त्याआधीच मृत्युमुखी पडल्याचे स्पष्ट झाले. पोलिसांना घटनास्थळी एक चिठ्ठी सापडल्याची माहिती मिळाली आहे. मात्र त्या चिठ्ठीतील नेमका मजकूर पोलिसांनी रात्री उशिरापर्यंत उघड केला नव्‍हता.

पोलिस, फॉरेन्सिक पथकाचा तपास

डिचोली पोलिस उपअधीक्षक श्रीदेवी बी. व्ही. तसेच इतर अधिकारी घटनास्थळी दाखल झाले. आमदार डॉ. चंद्रकांत शेट्ये यांनीही भेट देऊन माहिती घेतली. रात्री उशिरा फॉरेन्सिक पथकाने घटनास्थळी तपास करून काही संशयास्पद पुरावे गोळा केले. पोलिसांनी पंचनामा करून बाप-लेकाचा मृतदेह उत्तरीय तपासणीसाठी गोमेकॉत पाठविला.