Bicholim News : डिचोलीत औद्योगिक प्रगती शक्य : आमदार डॉ. चंद्रकांत शेट्ये

Bicholim News : डिचोली मतदारसंघात येणाऱ्या नियोजित लाटंबार्से औद्योगिक वसाहतीला चालना देण्यासाठी सरकारकडून आवश्यक ते सहकार्य मिळत आहे, असे आमदार डॉ. चंद्रकांत शेट्ये यांनी सांगून एकदा काय आयडीसी कार्यान्वित झाली, की मतदारसंघातील बेरोजगारीचा प्रश्न सुटण्यास मदत होणार आहे. त्याचबरोबर औद्योगिक प्रगती होणार आहे, असा विश्वास व्यक्त केला.

औद्योगिक वसाहतीत वीज ट्रान्स्फॉर्मर आणि पथदीपांचे उद्‍घाटन केल्यानंतर आमदार डॉ. शेट्ये बोलत होते.

यावेळी आयडीसीचे व्यवस्थापकीय संचालक अभिषेक परिमल, लाटंबार्सेचे सरपंच पद्माकर मळीक, मेणकुरेचे सरपंच गुरुदास परब, डॉ. रामा गावकर, पूजा घाडी आदी पंच सदस्य आणि ग्रामस्थ उपस्थित होते.

वीज पुरवठ्यासाठी ४० कोटी

लाटंबार्सेतील नियोजित ‘आयडीसी’त वीज उपकेंद्र आणि अंतर्गत वीजपुरवठ्यासाठी केंद्र आणि राज्य सरकारच्या सहकार्याने ४० कोटी रुपये खर्च करण्यात येणार आहेत. तूर्तास एक कोटी खर्चून परिसरात पथदीप कार्यान्वित करण्यात आले आहेत. ११ केव्ही क्षमतेची वीजवाहिनी घालण्यात आली असून त्यातून १४ उद्योग प्रकल्पांना वीजपुरवठा करणे शक्य होणार आहे, असे आमदार डॉ. शेट्ये यांनी सांगितले.

नियोजित आयडीसीत आत्तापर्यंत चार उद्योग प्रकल्पांनी नोंदणी केली आहे. वीजपुरवठा व्यवस्थित झाला, की या औद्योगिक वसाहतीला खऱ्या अर्थाने चालना मिळणार आहे. - डॉ. चंद्रकांत शेट्ये, आमदार