Goa Rain Update: बार्देशात पावसाचा तडाखा; तळेश्वर मंदिरात पाणी, गिरी पंचायतघर बंद

जुलै महिन्याच्या सुरुवातीपासून राज्यात पावसाची जोरदार बॅटिंग सुरु असून, सध्या नामोशी-गिरी येथे पूरसदृश स्थिती निर्माण झाली आहे. परिणामी, संततधार पडणाऱ्या पावसामुळे गिरी पंचायत घर मागील आठ दिवसांपासून बंद आहे.

गेले दोन दिवस मुसळधार पावसामुळे बार्देश तालुक्यातील जनजीवन पूर्णतः विस्कळीत झाले. पावसाच्या मारामुळे यावेळी तीन घरांच्या भिंती कोसळल्या. तर सात घरांवर झाडे कोसळली. कोलवाळ येथे तळेश्वर राष्ट्रोळी मंदिरात पाणी शिरले.

नामोशी गिरी येथे पावसाच्या पाण्याचा निचरा होत नसल्यामुळे पंचायत घर इमारतीसह या परिसरात पूरसदृश्य स्थिती निर्माण झाली आहे. हे पाणी इमारतीत शिरल्यामुळे ग्रामपंचायत घर आठवड्यापासून बंद ठेवले आहे. पंचायत कार्यालय बंद असल्यामुळे रहिवाशांची गैरसोय होत आहे.

पेन्हा दी फ्रान्स पंचायत क्षेत्रातील माटववाडो येथे रघुनाथ राताबोले हे राहत असलेल्या घराची भिंत कोसळली. फेअरा बाईश, म्हापसा येथे तेंडुलकर निवास घराची भिंत कोसळली. तर गावसावाडा म्हापसा येथे गोलतेकर यांच्या घराची भिंत कोसळली. या तिन्ही दुर्घटनेत सुमारे ४ लाखांचे नुकसान झाले आहे.

गिरी, पर्रा, खोर्ली, कोलवाळ, आसगाव या ठिकाणी सात घरांवर झाडे कोसळली. त्यातील तीन झाडे अग्निशामक दलाच्या जवानांनी कापून बाजूला केली. तर इतर चार झाडे ही कुशल व्यक्तींच्या मार्फत कापून घेण्याचा सल्ला घर मालकांना दिला. याशिवाय गिरी, आसगाव , हणजूण, पर्रा, हणजूण, थिवी, कारोना, आल्तीन-म्हापसा, दत्तवाडी म्हापसा, पिळर्ण, पोंबुर्फा, पैठण व पर्वरी या भागात झाडे वीजवाहिन्यांसह रस्त्यांवर कोसळली. म्हापसा, पिळर्ण व पर्वरी अग्निशामल दलाच्या जवानांनी ही झाडे कापून बाजूला केली.

‘तळेश्‍वर’चे नुकसान

कोणीवाडा-कोलवाळ येथील नाला तुंबल्यामुळे पावसाचे पाणी श्री तळेश्वर राष्ट्रोळी मंदिरात शिरून नुकसान झाले. राष्ट्रीय महामार्गाच्या रुंदीकरणावेळी नदीला जोडणाऱ्या नाल्याचे नियोजनाबद्दल बांधकाम झालेले नाही. त्यामुळे पावसाच्या पाण्याचा योग्य विसर्ग होत नसल्यामुळे हा परिसर बुडाला आहे.