केपे पालिकेत सत्ता बदलण्यासाठी काँग्रेस आमदारांचे प्रयत्न

केपे : केपे मतदारसंघावर चार वेळा आपले वर्चस्व अबाधित ठेवलेल्या बाबू कवळेकर यांचा पराभव करून किंग मेकर ठरलेले एल्टन डिकॉस्‍टा यांनी आता केपे पालिका मंडळ आपल्याकडे ओढण्याच्या कामाला सुरुवात केली आहे. हे मंडळ सध्या बाबू कवळेकर यांच्या ताब्यात असल्याने पालिका आपल्या ताब्यात घेण्यासाठी डिकॉस्‍टा यांनी काही नगरसेवकांच्या गाठीभेटी घेण्यास सुरुवात केली आहे.

केपे (quepem) पालिकेत एकूण तेरा सदस्य असून नऊ बाबू कवळेकर (Babu-Kavalekar) यांचे तर चार एल्टन डिकॉस्‍टा यांचे समर्थक आहेत. केपे पालिकेत नगराध्यक्षपद महिलांसाठी राखीव असल्याने सुचिता शिरवईकर यांच्याकडे हे पद आहे. एल्टन डिकॉस्‍टा यांना ही पालिका ताब्यात घेण्यासाठी कवळेकर गटातील तीन नगरसेवकांना फोडावे लागणार आहे. यात त्यांना कितपत यश येते ते पाहावे लागणार आहे.

विधानसभा निवडणुकीत (Assembly Election) नऊ पैकी फक्त आठ नगरसेवकांनी बाबू कवळेकर यांच्यासाठी काम केले होते यात फिलू डीकोस्ता यांनी कवळेकर यांच्या एकाही प्रचारसभेत भाग घेतला नसल्याने डिकॉस्‍टा यांनी कवळेकर यांच्यासाठी काम केले नसल्याचे स्पष्टपणे दिसून आले आहे.

एल्टन डिकॉस्‍टा हे जरी आमदार (MLA) झाले असले तरी त्यांना पालिका मंडळ स्थापन करण्यास सहजासहजी यश येणार नसल्याचे काही नगरसेवकांनी सांगितले. कवळेकर यांचे या पालिकेवर (municipality) वर्चस्व असून ज्या नगरसेवकांनी कवळेकर यांच्यासाठी काम केले नाही त्यांना बाजूला सारून कवळेकर हे परत एकदा मंडळात फेरबदल करू शकतात असे खास सूत्रांकडून समजले आहे.