पणजी: कॉंग्रेस (Congress) प्रमुख विरोधी पक्ष असताना विरोधी पक्षाना नेतृत्व देण्याच्या भूमिकेपासून कॉंग्रेसने पलायन केल्याने निर्माण झालेला राजकीय अवकाश भरून काढण्याचा प्रयत्न तृणमूल कॉंग्रेसने (Trinamool Congress) चालवला आहे. पश्चिम बंगालमध्ये (West Bengal) भाजप (BJP) आणि कॉंग्रेसलाही रोखण्याच्या अनुभवाच्या ताकदीवर या पक्षाने तिसऱ्यांदा आपले राजकीय भवितव्य गोव्यात (Goa Election) आजमावण्याचे ठरवले आहे.
तृणमूल कॉंग्रेसचे खासदार डेरिक ओ ब्रायन आणि प्रसून चक्रवर्ती काल गोव्यात दाखल झाले. ते मधल्या फळीतील नेते आहेत. पक्षाचे धोरणात्मक निर्णय घेण्यात त्यांचा समावेश असतो. त्याआधी महिनाभर पक्षाचे काही नेते राज्यात तळ ठोकून होते. त्यांनी काही जणांशी प्राथमिक चर्चा केली. त्यांनी पक्षात यावे यासाठी मनधरणी केली. त्यापैकी काही जणांना कोलकाता येथे नेण्यात आले. तेथे पक्षाच्या ध्येय धोरणांविषयी माहिती देण्यात आली आहे.
काही आजी माजी आमदार, इतर पक्षांचे पदाधिकारी, समाजधुरीण, विचारवंत अशी मोट तृणमूल कॉंग्रेस राज्यात बांधू इच्छित आहे. त्याची सुरवात विधानसभा निवडणुकीतून करण्याचे त्यांनी ठरवले असले तरी लोकसभा निवडणुकीवर त्यांचा जास्त भर असेल असे त्यांना भेटून आलेल्यांशी चर्चा केल्यावर समजले. तृणमूल कॉंग्रेसने अद्याप जाहीरपणे कोणताही कार्यक्रम राज्यात केला नसला तरी त्यांनी आपल्या संपर्क मोहिमेला गती दिल्याचे जाणवत आहे.
तृणमूल कॉंग्रेसची निवडणूक रणनीती प्रशांत किशोर ठरवत आहेत. त्यांच्या थेट मार्गदर्शनाखाली दोनशेजण गोव्यात पक्षाचे संघटनात्मक काम करत आहेत, अशी खात्रीलायक माहिती मिळाली आहे. त्यांच्याकडूनच गोव्यातून कोलकाता येथे गेलेल्यांशी संवाद साधून गोवा तृणमूलसाठी महत्त्वाचा का आहे आणि भाजप, काँग्रेस मुक्त गोवा कसा केला जाऊ शकतो याची माहिती देण्यात आली आहे.
ममता बॅनर्जी येणार
भाजप शासक राज्यात तृणमूल कॉंग्रेसचा विस्तार करण्याचे ठरविण्यात आले आहे. पश्चिम बंगालच्या मुख्यमंत्री ममता बॅनर्जी याही गोव्याच्या दौऱ्यावर येणार आहेत. गोव्यातील काही बुद्धिजीवींना कोलकाता येथे पक्षाच्या ध्येय धोरणांविषयी माहिती देण्यावर भर देण्यात येणार आहे.
युतीसाठी आमचे प्रयत्न
येत्या निवडणुकीत भाजपला पराभूत करण्यासाठी समविचारी पक्षांच्या युतीसाठी आपण प्रयत्न करत आहे. तृणमूल कॉंग्रेसला सोबत घेण्याचा विचार आहे. त्यासाठी तृणमूलच्या नेत्यांसोबत आपण चर्चा करणार आहे, अशी माहिती राष्ट्रवादी कॉंग्रेसचे प्रदेशाध्यक्ष जुझे फिलीप डिसोझा यांनी दिली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
